Intxixu Trail, bete-betea
Igandeko Intxixu Trailerako dortsal guztiak agortu egin dira, eta itxaron zerrenda dago. Hainbat xehetasun eman dituzte antolatzaileek.
Goraino betea. Hala heldu da igandeko Intxixu Trail mendiko lasterketaren bederatzigarren edizioa: salgai jarritako 250 dortsalak maiatzaren 9an agortu egin ziren. Gainera, itxaron zerrenda zabaldu, eta beste 44 korrikalarik dute bertan izena emana, onartuen zerrendatik baten batek huts egingo duenaren esperantzarekin. Hainbat xehetasun eman dituzte Intxixu Trail-Giriziako antolatzaileek. Iazko parte hartzaileen marka hautsi da aurtengoan, 219 izan zirelako 2023an izen emateak.
Lasterketa 10:00etan hasiko da. Hala, dortsalak irteera gunean jaso behar dira, 08:30etik 09:30ak arte. Ergoien auzoko Uztapide plazan ezarriko dute gune hori (aldi berean bertan hasi eta bukatuko da proba).
16,5 kilometroko lasterketan (901 metroko desnibel positiboa) sei anoa postu izango direla jakinarazi dute antolatzaileek (beheko grafikoan ikus daitezke). Gunearen arabera, era bateko edo besteko hornigaiak jaso ahal izango dituzte korrikalariek. Gainera, Urzelaieta (7-8 kilometroen artean) Pilotasoro (11. kilometroaren inguruan) osasun arreta zerbitzuak izanen dira, baita irteera-helmuga gunean ere.
