"Jarrai dezagun aurrera"
Bost urte bete dituelako, ospakizunerako eta gogoetarako ekitaldia egin zuten atzo arratsaldean Errenteria-Oreretako Emakumeen Etxean.
Atzoko ospakizunean dozenaka emakume bildu ziren.Ikerne Zarate 
Errenteria-Oreretako Emakumeen Etxeak bost urte bete ditu. Atzo (ostirala) urteurrenaren harirako festa eta gogoeta egin zituzten etxean bertan, dozenaka emakumeren partaidetzarekin. 2016an ekin zioten, parte hartze prozesu baten bitartez, herriko emakumeen espazioa izango zena zer eta nolakoa izango zen hausnartzen. 2019an zabaldu zituen ateak hasieran amets, baina ekinaren ekinez errealitate bihurtu zen aterpea. Ehunka izan dira era batera edo bestera proiektuaren zati izan direnak, etxearen zerbitzuak erabili dituztenak, eta gune seguru eta konfiantzazko batean euren bizitzaren zati bat egituratu dutenak.
Gogoetarako tartea ere izan zen atzokoan. Arduradunek aipatu zuten erabiltzaile asko izan bai, baina kudeaketa eta erabaki eremuetan gainbehera izan dela azken urteetan, batez ere pandemiaren ondorenean. Horri eusteko beharra nabarmendu zuten, eta emakumeei eskatu zieten aurrera urratsa egiteko Emakumeen Etxearen izaera eta existentzia askoren artean hartutako erabakien bidez bideratuko delako. Kantu taldeak emanaldia eskaini zuen, emozioz abestu zuten, ikus-entzuleak emozionatu zituzten. Pozik denak. Urteurrenerako propio prestatutako abestian esan bezala, “jarrai dezagun aurrera” esan zuten emakumeek irribarre zabal-zabal batekin (behean abesti horren bideoa).
Indarkeriarik Gabeko Bizitzen Aldeko taldeko kideek ere hitza hartu zuten atzoko arratsalde goxoan. Azaldu zuten indarkeria matxista jasan duten emakumeek baliabide gehiago behar dituztela aurrera egiteko, askotarikoak: etxebizitza seguruen eskubidetik hasita, lan arloraino. Resistiré abestia abestu zuten hitzezko mezuaren ondoren.
Ondoren zerbait jateko, eta musika gehiagorekin dantzatzeko unea iritsi zen. Bost urte feminismotik herrian eragiten. Errenteria-Orereta bizigarriago bat egiten. Hori ospatu zuten atzo Emakumeen Etxean.
