Euskal Jaia delako, euria ere agertu da
Euskal Jaia egiten ari dira Lezon. Goizean dantza eta dantzariak izan dira nagusi, eta arratsalde hezean, Sagardo Festa.
Gaur, Euskal Jaia Lezon. Ilun samar hasi da eguna, euririk gabe. Horrek goizerako prest zeuden ekitaldiak egitea ahalbidetu du, eta horrela, Lezoko Dantzazleen ekimenez herriko plazetan dantzaldiak egin dira, eta ondoren, herrira etorri diren 150 dantzariek saio bateratua egin dute bazkaldu aurretik Gurutze Santuaren plazan. Horren aurretik, herri kirolak izan dira herriaren erdiguneko zabalgunean. Gainera, bisitari bereziak izan ditu herriak gaurkoak: Tuterako Tuteran Jai taldekoak. Izan ere, martxoan Piztu Lezokoak Nafarroako herri hartan izan ziren bi udalerrietako gazteen topaketan, eta gaurkoan, bueltakoa iritsi da, nafarrak Lezon izan dira. Euritan hasi da bazkalorduan.
Arratsaldean, eguneko beste ekitaldi nabarmenena: Tiñeluren XXIV. Sagardo Festa. Euskal Jaia izaki, zirimiri modura —hasieran bai, behintzat— euriak ezin zuen hutsik egin, eta horrek herriko hamabi baserritako sagardoak dastatzeko ekitaldia baldintzatu du. Hala, Gurutze Santuaren plazan beharrean, Karlos Saldise plazako aterpean egin dute. Edonola ere, apurka Saldise bete egin da herriko hamabi baserritako zukua probatzeko gogoz zeuden gazte eta helduekin. Urtero herriko eragile bati aitortza egiten dio Tiñeluk: Etxetxo Lezoko Memoria Historikoaren Talderi egin diote oles, 2016an bidea hasi zuenetik herriari eta udalerriaren memoria kolektiboari egindako ekarpenagatik. Bi sagarrondo eman dizkiete Tiñelukoek Etxetxokoei, sortzen ari diren Memoriaren Basoan landatzeko. Lezoko Dantzazaleen laguntzarekin sagardotegi den-denak aurkeztu, eta txotx garaia hasi da.
Azken sagardo tragoskak bitartean, Lezoko Dantzazaleek Larrain dantza egin dute. Ondoren dezibelioak biderkatu egin dira herritik, Ixtaklok elektrotxarangak bazter bustiak girotu dituelako (20:00etan zen hastekoa talde horren kalebuelta). Gauean, kontzertuak Saldisen Edu Zardoya, Sala eta Garazirekin.
Jarraian, arratsaldeko hainbat irudi, eta hasierako bideo bat.
