Biyurriek badakite zer den esker ona
Biyurrienea Eskertza Eguna ari da ospatzen, era batera edo bestera lagun izan dituztenei esker on mezua emateko. Goizean, Baga, Biga, Ligaren azkena.
Esker oneko izatea gizakien (batez ere) dohaina omen da. Jaso eta eman. Ondoren gehiago eta hobeto jaso eta emateko. Tartean esker onik ez bada, ordea, jaso-eman bikoaren tartean haustura izan daiteke. Hori ongi asko dakite Oiartzungo Biyurrienea gazte mugimenduko kideek, eta euren erara, eskerrak emateko eguna izan dute gaurkoa: Eskertza Eguna. Eskerrak era batera edo bestera urtean zehar egiten dituztenetan lagundu dutenei, gazteei, oiartzuarrei, alboan dituzten eragileei… Denei. Gainera, izaeraz bete dute gaurko eguna, Baga, Biga, Ligaren azken proba egin dutelako herriko kuadrillek, mugalariena, Maddi Sansberro mugalari oiartzuarra bereziki gogoan izan dutelarik.
Goizean zehar Baga, Biga Ligako azken proba eginda, bazkaltzera bildu dira 250-300 bat gazte Madalensoroko plazako karpara. Estalpea bermatzea antolatzaileen erabaki aproposa izan da, euritan zelako jada 14:30ak alderako. Paella irensten hasi aurretik, ordea, bi gauza egin dituzte antolatzaileek: bat, otsailean abiatu zuten ligaren podiumaren berri eman; bi: egunari zegokion esker on mezua zabaldu (beheko bideoan mezu osoa). Hala, otsailean hasi eta hilabete bakoitzean talde joko eta jolas bat egin ondoren, hobekien moldatu direnak Bostgutxi taldekoak izan dira, haien segidan Mokollloak lagunartekoak izan dira Oiartzungo olinpiada txikietan bigarren; podiumaren hirugarren koskara Belarrimotzak ekipokoak igo dira. Zorionak horiek, eta ligan izan diren talde den-denei!
Bazkaldu aurreko ekitalditxoan, izan dira elkartasun hitzak. Batetik, Yakovlev 42 taldekideei babes osoa adierazi diete, Guardia Zibilak aktibatutako ikerketa batengatik auzipetuak izan direlako. Bestetik, Galder Barbado eta Aitor Zelaiaren atxiloketen kontra Ernaik egindako protestetan 133 gazteri ia 300.000 euroko isuna heldu zaielako, gazte haiei eta jazarriak izaten ari diren guztiei elkartasun mezua helarazi diete.
Paella jan, eta arratsaldetik gau partera arte kontzertuak izango dira Madalensoro atariko eremuan. Beheko koadro urdinean, musika taldeen zerrenda eta noiz joko duten.
Gaurko egunaren bi lagin, behean. Bazkari aurreko bideoa, eta argazki sorta.
Biyurrienearen Eskertza Eguna. Arratsaldeko kontzertuak.
- 18:00etan: Gabezin.
- 21:30ean: Dj Fifi eta Fefa.
- 23:30ean: Modus Operandi.
- 02:00etan: Dj Fresa Morango.
