EH Bilduren gehiengo osoa Lezon
Orain Errepublikak hautagaitzaren barruan zegoen alderdiak botoen %51,21 jaso du. Ondoren PSOE eta EAJ izan dira bozkatuenak.
Atzoko Europako Parlamenturako hauteskundeen emaitzek, azken hauteskundeetan Lezon izan den joera berretsi egin dute: EH Bildu garaile, gehiengo osoz. Herrian eman ziren 2.219 bozetatik 1.135 eskuratu zituen Orain Errepublikak zerrendak (bertako Euskal Herriko partaidea EH Bildu da), guztien %51,21. Ondoren PSOEren hautagaitzak jaso zuen babes gehien (429 boz, %19,35) eta hirugarren izan zen EAJk ordezkatzen zuen CEUS (352 boz, %15,88).
Altua izan zen abstentzioa atzokoan. Herrian botoa emateko eskubidea zuten 4.793 herritarren artetik erdia baino gutxiago joan zen hauteslekura, abstentzio tasa %53,7koa izan zelako. Europako Legebiltzarrerako hauteskundeen abstentzio maila %35,96koa izan zen herrian 2019ko aurreko hauteskundeetan. Kontuan hartzekoa da 2019ko hauteskunde horiek, udal eta foru hauteskundeekin bat egin zutela.
Jarraian, atzoko emaitzen zerrenda (%1eko boz kopurua lortutako alderdiena), eta parentesi artean, 2019ko emaitzak.
- EH Bildu (Orain Errepublikak): 1.135 boto, %51,21 (1.325, %43,43).
- PSOE: 429 boto, %19,35 (327, %10,72).
- EAJ (CEUS): 352 boto, %15,88 (868, %28,45).
- PP: 101, %4,55 (66, %2,16).
- Sumar: 61, %2,75 (2019ko bozetan ez zen izan).
- Podemos: 60, %2,70 (325, %10,65).
- Vox: 33, %1,48 (6, %0,2).
