Euskal Jaian, Dantzazaleen festa
Goizean eta eguerdian dantzaz bete zituzten herriko plazak 150 bat dantzarik. Arratsaldean Sagardo Festarekin bat egin zuten.
Larunbateko Lezoko Euskal Jaiaren barruan, Lezoko Dantzazaleen ekimenez II. Dantzari Festa jaso zuen herriak. Lezoko, nahiz Euskal Herriko txoko askotatik etorritako dantzariek bat egin zuten herriko festarekin. Hala, goizean plazaz plaza izan ziren taldeka banatuta dantzan 150 bat dantzari, eta eguerdian dantzaldi bateratua egin zuten Gurutze Santuaren plazan. Ondoren, bazkatzera bildu ziren Lezoko Herri Eskolako jolastoki estalian. Eguraldiak ateri iraun zuen goizeko ekitaldiak bitartean.
Bazkalostean, Sagardo Festaren XXIV. ekitaldiarekin bat egin zuten dantzariek. Lehenik eta behin, Tiñeluren festako sagardotegien aurkezpen saioen protagonista izan ziren Lezoko Dantzazaleak. Jarraian, jada azken tragoskekin, Larrain dantza-ri ekin zioten. Azken jarduera horiek Karlos Saldise plazan egin zituzten, euriak jada aterpe kanpoko ekintzak eragotzi zituelako.
Jarraian, herrian izan zen dantza giroaren hainbat irudi, Lezoko Dantzazaleek HITZAra bidalitakoak.
