Maialen, Hibaikaren bi traineruen amabitxi
Ostegunean egingo du Hibaika Arraun Elkarteak 2024 denboraldiko bi eskifaien aurkezpena. Asteburuan Lekeitioko Ikurrina jokatu zuten: hirugarren sailkatu zen emakumeen ontzia, eta bederatzigarren gizonena.
Maialen izango da amabitxia. Irudian, Xanti eta Maialen, buruhandien konpartsa eta udal txistulari taldea, madalenetako artxiboko irudi batean. Erraldoia izango zela traineruen aurtengo aurkezpen ekitaldia iragarri zuen joan den astean Hibaika Arraun Elkarteak. Misterioa argituta, argi dago handia izango dela, oso handia. Izan ere, Maialen erraldoia izango da izen bera daramaten Hibaikaren emakume zein gizonen traineruen amabitxia. Ostegunean egingo du bi ontzietako eskifaien aurkezpena Zumardian, 19:30ean arraun elkarteak, eta hutsik egin gabe, bertan izango da Maialen herriko arraunlariei babesa ematen.
Ez da bakarrik ariko, lagun izango ditu Xanti eta buruhandien konpartsako kideak ere. Udal Txistulari Taldeak ere bat egin du aurkezpen erraldoi horrekin, hura girotzeko.
Hibaika Arraun Elkartearentzat “ohorea” da herrian hain ezaguna eta maitatua den pertsonaia izatea bi traineruen amabitxia, “ederra da Maialenek bi traineruak eta gure arraunlariak babestea”.
Osteguneko aurkezpen ekitaldiaren atzean lan handia dago, baina batez ere ilusioa. Ilusio hori, herritarrekin partekatu nahi du arraun elkarteak, eta hori horrela, herritar guztiak deitu ditu ekitaldian parte hartzera. Ez hori bakarrik, arraun denboraldian Hibaikaren bi ontziak animatzera ere deitu dituzte herritarrak: “Hibaikaren kamiseta, zapia, bandera edota klubaren koloreak soinean herriko arraunlariak animatzera deitu nahi ditugu herritar guztiak. Izan ere, sua uretan pizteko ezinbesteko erregaia dute arraunlariek babes hori”.
Bazkidetzarako deia ere egin du bide batez, arraun elkarteak. Gogora ekarri du zabalik dagoela bazkide egiteko aukera, eta horrekin hainbat abantaila izango dituztela bazkideek arraun elkarteko materiala erosterakoan, “gainera, Hibaikari sustengua emango diote”.
Osteguneko aurkezpen ekitaldiaren testuinguruan argazki erakusketa egingo du Hibaikak, eta arraun elkartearen materiala salgai izango du.
Lekeitioko estropada
Larunbatean jokatutako Lekeitioko Ikurrinean hirugarren sailkatu ziren Hibaikako emakumeak, Hondarribia eta Zumaiaren atzetik. Gizonen ontzia, berriz, bederatzigarrena sailkatu zen. Emakumeetan, Hondarribia Arraun Elkarteko ontzia izan zen nagusi 11:17ko denborarekin. Zumaia gertu-gertu, bigarren sailkatu zen, segundo batera heldu ez zen diferentziarekin. Hibaikaren ontzia, hirugarren izan zen, 11:32 denborarekin.
Gizonetan, Zarautz izan zen azkarrena 20:50eko denbora eginda. Hibaika, esan moduan, bederatzigarren sailkatu zen, 21:37 denbora eginda, Arkote, Kaiku, Orio, Busturialdea, San Pedro, Isuntza eta Lutxanaren aurretik. Sailkapen osoa hemen kontsulta daiteke.
