Herri ekimenak izaeraz eta mezuz bete du Pasaiako Dantza Festibalaren azken eguna
'Zabor arteko loreak' herri ikuskizunarekin eta Ttipika taldearen emanaldiarekin bukatu zen atzo Pasaiako Dantza Festibala.
Atzoko emanaldiaren une bat.Pasaiako Dantza Festibala Bukatu da 2024ko Pasaiako Dantza Festibala (PDF). Emankorra eta jendetsua izan da Haatik konpainiak Pasaiako Udalak elkarlanean antolatutako arte eszenikoen jaialdia. Atzo izan ziren azken emanaldiak: herri ekimenetik sortutako Zaborren arteko loreak ikuskizunari eutsi zioten eguerdiz 30 bat antxotarrek, eta ondoren, Ttipika taldearen eskutik dantzaldi gidatua izan zen jaialdiari azken ginga jarri zion ekitaldia. Biteri plazan ziren egitekoak bi jarduera horiek, baina eguraldi eskasagatik 400 bat ikuslerekin lepo bete zen Ibaiondo pilotalekuak jaso zituen; Katuen Etxadian egitekoa zen barra klasikoa bertan behera utzi zuten.
Zaintza zuten gai Zaborren arteko loreak ikuskizunean. Ni kontzeptutik, gu-ra pasatzeko mezua zabaldu zuten dantzaren eta musikaren bidez. Gaia Antxoko Topagunearen ekimenez hautatu zuten Noemi Viana dantzari eta koreografoaren zuzendaritzapean izan diren herri dantzariek, eta sormen prozesu kolektibo baten emaitza izan zen atzokoan Ibaiondon ikusi ahal izan zena. 45 minutu errepikaezin, indartsu, hauskor, emankor eta emozionante. Antxoren izaeraren gaineko gogoeta, indibidualismotik atera eta inguruari ekarpena egitekoa. Itxuragatik gutxietsia den barrutia izanagatik ere, bertako biztanleen ekiteko ahalmena goretsi zuen piezak, elkarrekin eta elkarlanean sortzeko eta eraldatzeko desioa oinarri, loreak eskuan. Hori guztia dantzarekin, zuzeneko musika eta abeslariekin, nahiz antxotarren presentzia erabatekoarekin gauzatu zen. Pilotalekuaren zentroko dantza eremu laukituan haur, gazte, heldu nahiz adinekoak elkar zaintzen, bakoitza bere egiteko edo pentsatzeko eratik.
Horrenbestez, aurtengo PDFk egin du bidea. Antolatzaileen balorazio ofizialaren zain, ostegunetik atzora arte ekitaldi guztiek herritarren eta dantzaren zaleen oniritzia izan dute, parte hartze handiarekin. Ziur, jada zazpigarren PDFn pentsatzen hasi direla jardueraren gidariak.
Jarraian, Zaborren arteko loreak herri ekimeneko ikuskizunaren hainbat irudi, Pasaiako Dantza Festibalak eta Iñaki Ruizek HITZAri emandakoak.
