Errenteriak irabazi du Herriarteko Pala txapelketa, zazpigarrenez
Arnasa kentzeko moduko finala izan zen igandekoa, harmailak jendez lepo, eta emozio bizia partidetan. Azkenean, txapelak etxera.
Errenteriako taldea Leire Mazizior Kirol zinegotziarekin. Argazkia: Gipuzkoako Pilota Federazioa Emozio handiko partida, arnasa kentzeko modukoa igandeko Herriarteko Pala Txapelketaren finala. Harmailak jendez lepo, bi taldeetako zaleekin, ezin da gehiago eskatu osagai guztiak bildu zituen finala izan zelako. Larruzko Paletan garaipena Andoainentzat 32-35; Pala Motzean, berriz, garaipena errenteriarrentzat 40-31. Azkenean, sei tantoko abantaila erabakigarria izan zen Errenteriak irabazteko.
Eskisabel eta Rubenek partida gogorra jokatu zuten, Andoaingo Lopez de Muniain eta X. Alkortaren kontra. Lopez de Munianen erakustaldi bikaina, bi eskuekin bikain pilotaria, Alkortak ongi babestutako partidan. Eskisabel seguru partida guztian, eta Ruben egoki, baina beste partidetan erakutsi ohi duen gatzik gabe. 30-30 berdinduta izan ziren, baina azkenean 32-35 Andoianen alde jarriz en markagailua.
Pala Motzeko partidan atzetik joan ziren Yorel eta Abel 11-20 eta 20-27 Andoiango Altuna eta Iradiren kontra. Partidan sartzea kostatu zitzaien errenteriarrei, eta ez zuten euren ohiko mailarik eman. Bazirudien txapelak Andoinek irabaziko zituela baina ez zen hala izan; dena galduta zegoela zirudienean, Yorel eta Abel suspertu eta euren ohiko mailan jokatzen hasi ziren. 20-4ko aldeko partzialak garaipena eman zion Errenteriari, eta bukaeran, 40-31 Yorel eta Abelen alde.
Egiari zor, partidaren azken herenean euren mailan jokatzea galarazi zien arazo fisikoak izan zituzten Altuna eta Iradik.
Taberna eta Chiapuso Euskal Ligako txapeldun
Garaipena Palako Herriarteko txapelketan, eta garaipena EPLEko pilotarientzat Euskal Ligan. Trinkete modalitateko EPLEko pilotariek hiru final jokatu dituzte asteburuan. Abadiñon jokatutako Euskal Ligako finaletan, eskuz binakako modalitateko txapelak Taberna eta Chiapusorentzat; Lemoako Aurrekoetxea eta Eraña 10-40 irabazi zituzten EPLEkoek. Erakustaldi biribila bi pilotariena, aurkariei aukerarik eman ez ziena.
Gazte Mailako eskuz banakako finalean, gogor borrokatu zen Lizarazu eta garesti saldu porrota: 30-35 galduz uen Behar zana taldeko Otaegiren kontra. Partida bikaina bi pilotariek jokatu zutena.
Espainiako Estatuko eskuz binakako Trinkete modalitateko finalean garaipenik ez. Garatea eta Aranburuk ez zuten lortu irabaztea Santamaria eta Luquinen contra.
