Farmazien sektorea aukeratu dute aurten euskara indartzeko
Aurtengoan hiru ekimen egingo dituzte euskara indartzeko. Eskualdeko farmazia guztiei egin diete ekimenean parte hartzeko deia.
Oarsoaldeko udalek 27 urte daramatzate elkarlanean merkataritza eta ostalaritzan euskararen normalizazioa sustatzeko. Urte bakoitzean Oarsoaldeko sektore bat aukeratzen dute euskara indartzeko, eta 2024 honetarako farmazien sektorea aukeratu dute. Gaur aurkeztu dute euskara sustatzeko egitasmoa Oiartzungo Ana Agirrezabalaga botikan. Han izan zira Ane Miren Agirre farmazia horretako arduraduna, eta eskualdeko Euskara arloetako zinegotziak: Aiako Harria Gaztelumendi (Oiartzun), Leire Mazizior (Errenteria), Iker Salaberria (Lezo) eta Laura Ré (Pasaia). Ibon Mokoroa Farmazialari Euskaldunen Elkarteko lehendakariak ere parte hartu du aurkezpenean. Gaztelumendik nabarmendu du sektorekako egitasmo honetan “ahalegin berezia” egiten 27 urte daramatzala Oarsoaldeko Euskara Batzordeak.
Oraingoz, Oarsoaldeko 28 botikek eta bi parafarmaziek erakutsi dute parte hartzeko interesa. Leire Mazizior Errenteriako zinegotziak aurtengo hiru ekimenak aurkeztu ditu:
- 100 egun, 100 hitz. Egutegi-hiztegiak banatuko dituzte eskualdeko botiketan, uztailaren 1etik urriaren 8ra bitartean baliagarriak izango direnak. Hiztegi horretan sendagaien salerosketarekin zerikusia duen hitz edo esaldi bat agertuko da egunero, bai eta osasunarekin zerikusia duten atsotitzak ere.
- Euskara sendagaien euskarrietan sartzea. Sendagaiak ekoizten dituzten enpresa batzuekin lankidetzan jardungo da euskara beren produktuen aurkezpen-euskarrietan eta farmazietako titularrekiko harremanetan sartzeko.
- Bezero euskaldunentzako osasun zorro txiki bat. Azaroaren 4tik 19ra farmazietan euskaraz hitz egiten duten bezeroek poltsikoko osasun zorro txiki bat jasoko dute opari gisa.
Lezoko Iker Salaberriaren arabera, jada izena emana duten 30 establezimenduez aparte, botika gehiago nahi dituztela egitasmorako. Hala iniziatiban parte hartu nahi dutenek udaleko euskara zerbitzura jo dezakete, 943 49 41 29 zenbakira deitu edo helbide honetara idatzi dezakete. Mokoroak, bere aldetik, farmazialari euskaldunek zerbitzuaren kalitatearekin duten konpromisoaren berri eman zuen, eta kalitate horren ezaugarrietakoa tratu pertsonalizatua euskaraz ematea dela. Pasaiako Laura Rék deia egin zien eskualdeko farmazietako langileei euskara erabiltzera, baita tokian tokiko udalek ematen dituzten laguntzak baliatzera. Bezeroei ere hizkuntzaren aldeko aurrera urratsa egiteko gonbita luzatu ziem.
