Urteko uzta erakutsiko dute Xenpelar tailerretako ikasleek
Bihar 19:00etan zabalduko dute erakusketa Merkatuzarreko Jose Luis Caso aretoan eta hilaren 18ra arte bisitatu ahalko da astelehenetik larunbatera, 17:00etatik 20:00etara.
Gaur egin dute aurkezpena Merkatuzarren. Argazkia: Herri Bizia Ikasturtean zehar ikasitakoaren ispilu bilakatuko da Xenpelar tailerretako ikasleen erakusketa. Merkatuzarreko Jose Luis Caso aretoak hartuko du bihartik erakusketa hori, eta hilaren 18ra arte bisitatzeko aukera izango da astelehenetik larunbatera, 17:00etatik 20:00etara.
Gaur eman dute horren berri, eta aldi berean 2024-2025 ikasturterako aurreikusitako tailerren eskaintzaren berri eman. Helduei begira askotariko tailerrak antolatu dituzte ikasturte berrirako ere, urte osokoak edo lau hilabetekoak astean 2-6 orduko iraupenarekin. Hala, pintura, zeramika, argazkigintza, zur taila, altzarien zaharberritzea, eta patchworka izango dira aukeran. Berrikuntzarik ere bada, izan ere, lauhileko eskaintzaren barruan pintura eta argazki ikastaro berezi bana antolatu dute: Van Gogh erara margotzen pintura ikastaroa, eta Kamera erabileraren monografikoa argazki ikastaroa.
Ikastaroren bat egin nahi dutenek bi aukera izango dituzte matrikula egiteko. Irailaren 2tik 13ra online egin ditzakete. Horretarako, egin klik hemen. Beste aukera, irailaren 9tik 13ra presentzialki egitea da, Zu! Zure Udala arreta zerbitzuan. Bi kasutan hitzordua eskatu beharko da irailaren 5etik 13ra 943 44 96 00 edo 010 telefono zenbakietara deitua.
