Ikasleen emanaldiek jarriko diote ginga Herri Arte Eskolaren ikasturteari
Ikasturteari merezi moduan emango diote bukaera. Aste honetan zehar egingo dituzte ikasleek emanaldiak.
![](https://oarsoaldea.hitza.eus/site/files/2023/06/herri-arte-eskola-ikasturte-amaiera2023_h.jpg)
Ikasturte bukaera heldu da Herri Arte Eskolara ere, eta ginga jartzeko, ikasleen emanaldiak ondu dituzte aste honetan zehar. Gaur bertan piano entzunaldiak izango dira 17:3oean eta 18:15ean, Herri Arte Eskolan. 19:00etan berriz, hitzordu bikoitza, izan ere, antzerki taldeko ikasleek egingo dute emanaldia Niessengo auditorioan, baita, haize instrumentu taldekoek ere Herri Arte Eskolan.
Bihar berriz, haize instrumentuen emanaldia izango da 17:30ean Herri Arte Eskolan; leku berean, baina 18:00etan perkusio taldea eta jazz konbo taldearen txanda izango da, eta 18:30ean, Hitzaren eremuaren emanaldia Lekuona Fabrikako plaza berdean. Dantza diziplina guztien emanaldia Lekuona Fabrikan, 19:00etan egingo dute, eta 19:30ean Donostia eta Errenteria-Oreretako helduen elkartruke emanaldia izango da Niessen Kulturguneko auditorioan.
Asteazkenean dantza diziplina guztien emanaldiak zabalduko du egitaraua 18:00etan Lekuona Fabrikan. Espazio horretan ere, Hitzaren eremua, 18:30ean hasita. Herri Arte Eskolan bertan, trikiti eta pandero ikasleak ariko dira 19:30ean, eta 20:00etan antzerkiak hartuko du lekukoa Herri Arte Eskolan bertan.
Ostegunean 16:00etatik 20:00etara antzerki elkartrukea egingo dute Herri Arte Eskolan. 18:00etan Ganbera taldea eta Banda Txikia Niessengo auditorioan, eta 19:30ean pop rock taldea eta ganbera taldea.
Ostiralean bukatuko dira emanaldiak, eta 19:00etan emanaldi ederra eskainiko dute Lekuona Fabrikan Orkestra ikasleen bandak eta Atlantikaldiako taldeak, eta dantzak ere ez du hutsik egingo.