Artisau jostailuen jardunaldiak antolatu ditu Kroma elkarteak
Jardunaldien barruan erakusketa interaktiboa, liburu joko kluba, kaleko jolasak, eta tailerrak antolatu ditu Kroma Artisau Elkarteak hilaren 24tik 30era.
Kroma Artisau Elkarteko Alberto Monroy eta Eva Diaz de Isla. Kroma Artisau Elkarteak artisau jolas eta jokoen gaineko jardunaldiak antolatu ditu hilaren 24tik 30era bitartean. Horren barruan erakusketa interaktiboa antolatu du Xenpelar Etxean. Erakusketa horretara, Kromosoma Tailerraren jarduera eta tokiko zein Oarsoaldeko beste elkarte soziokultural askorekin azken hamar urteetan egindako lankidetzaren erakusle diren argazkiak bildu ditu elkarteak. Hilaren 24tik 28ra izango da zabalik, 17:00etatik 20:00etara Xenpelar etxearen lehenengo solairuan. Zurezko artisau jolas eta jostailuak ikusgai izango dira, eta horiekin jolasteko aukera izango da.
Jardunaldien barruan ipuin kontalariak ere egingo du saioa. Mestiza elkarteak, Liburu joko kluba ipuin kontaketa egingo du hilaren 28an, Xenpelar Etxean hori ere, 8 eta 12 urte arteko ahurrei begira. Literaturaren mundu magikoa aztertuko dute liburu eta jolasen bidez, sormena eta irudimena landuta. Euskaraz, gaztelaniaz eta ingelesez izango da saioa, antolatzaileek zehaztu dutenez, “kultur aniztasuna sustatzea” duelako helburu jarduera horrek. Erreserba egin behar da parte hartzeko 636 89 85 43 telefono zenbakira deituta edota zenbaki berera whatsApp mezua bidalita.
Astea ixteko, hilaren 29 eta 30ean kaleko artisau jolasak eta tailerrak antolatu ditu Kromak. 11:00etatik 13:00etara izango dira ekitaldiak, larunbatean Foru plazan, eta igandean Agirre Lehendakariaren plazan. Tailerak, adin guztietako haurrei begirakoak dira eta irekiak, eta bertaratzen direnei euren jolasa sortzeko aukera emango die. Euria egingo balu, larunbateko saioa Koldo Mitxelenako patio estalira lekualdatuko dute.
