Larunbata, dantzari emana
Dantza programazio berezia ondu dute Dantza Hirian eta Maitaldia jaialdiek larunbaterako.
![](https://oarsoaldea.hitza.eus/site/files/2024/09/dantza-hirian-eta-maitaldia.jpg)
Herri bat dantzari emana. Hala izango da Errenteria-Orereta larunbatean Dantza Hirian eta Maitaldia jaialdiek antolatutako egun osoko programazioaren harira. Gaur aurkeztu dute xehe dantza erdi-erdian jarriko duen programazio berezi hori Lekuona Fabrikan Aizpea Otaegi alkateak, Maite Gartzia Kultura zinegotziak, Jon Maya Kukai Dantzaren zuzendari eta MMBren asoziatuak, Thierry Malandain Maitaldia festibalaren zuzendari artsitsikoak, eta Marie Christine Riviere Ballet Malandain Biarritzeko lurralde eta nazioarteko lankidetzarako ordezkariak. ez dira bakarrik azaldu prentsa aurrera, larunbatean programan parte hartuko duten eragileak lagunduta egin dute.
Ekintzez jositako egunaren estreinaldia Dantza Hirian jaialdiaren eskutik helduko da. Hiru dantzaz gozatzeko aukera eskainiko du ordu eta leku ezberdinetan. Herriko Plazak hartuko du Larrua Euskadiren Sangre y Clorofila dantza ikuskizuna 12:30ean; agertoki bera izango du 12:45ean, Ixaren Ollos cara adetro lanak; Laura Lopez eta Pablo Perezen Bailaban las pelotas dantza lana, berriz, Xabier Olaskoaga plazan jokatuko dute 13:15ean.
maitaldia jaialdiak hartuko du lekukoa arratsaldean. Miarritzen egiten den dantza saio irekien jaialdiak Gipuzkoara egingo du jauzi, Errenteria-Orereta bihurtuta haren egoitza. Maitaldia—Temps d’Aimer Errenteria-Oreretara esportatzea Lapurdi eta Gipuzkoaren artean garatutako proiektuen jarraipenean kokatu dute, “Malandain Ballet Biarritzeko Lurralde Polo Koreografikoak koordinatuta, lurralde ezarpen iraunkorra errazteko. gainera, Malandain Ballet Biarritzek eta Jon Maya/Kukai Dantzak artista asoziatu gisa duten hitzarmenari esker sortutako iniziatiba ere bada”.
Erreferentziazko nazioarteko dantza jaialdi hori Errenteria-Oreretara ekartzea “pozgarria” dela aitortu du Mayak, “mugaz gaindiko proiektu bat jartzen da balioan”. Bide beretik mintzatu dira Malandain eta Riviere, “dantza mugimenduan oinarritzen den bezala, Iparraldearen eta Hegoaldearen artean ere mugimendu eta elkartrukeak sortzen ari gara. Errenteriak dantzaren munduan duen ekosistema garrantzitsua da horretarako”.
Arratsaldeko egitaraua
Arratsaldeko lehen protagonistak herriko Plazan 18:00etatik aurrera egingo diren kale ikuskizunak izango dira. Herri arte Eskolak, Kukai Dantzak, eta Ereintza Dantza Taldeak hartuko dute parte horietan, baita Gipuzkoako Dantzaguneak Errenteriako Udalarekin batera aukeratutako Ainhoa Usandizagaren Bihar eta DABen Nun zira lanek ere.
Ondoren Alemaniako ballet X Shewrin konpainiaren Bach, past, present, future ballet emanaldia ikusi ahal izango da Lekuona Fabrikan 20:00etatik aurrera. Sarrerak eskuragarri daude jada 9 euroan, egin klik hemen. Era berean, egunean bertan eskuratu ahalko dira ordubete lehenago leihatilan, aurretik agortu ez badira.