EH Bildu: "Gaur, 88 urte geroago, tradizio eta erregimen horren oinordekoak berpiztu dira"
1936ko irailaren 13an tropa frankistek Errenteria-Orereta bere egin zuten. Horren harira adierazpena landu eta zabaldu du herriko EH Bilduk.
1936koa da irudia, frankistek 'Avenida de Navarra' inauguratu zutenekoa. Argazkia: Kutxa Fototeka-Pascual Marin Gaurko egun batez, 1936an, tropa frankistak Errenteria-Oreretan sartu eta bere egin zuten herria. Horren harira, herriko EH Bilduk adierazpena egin du, orduko hartan izandakoak oroitarazteko, eta “hainbeste ahalegin eta borrokarekin abiatu ditugun askatasunak galtzeko arriskua” dagoela uste dutelako. Hainbat gogoeta partekatu nahi izan dituzte adierazpenaren bitartez, 1936ko irailaren 13ko hura oinarri hartuta.
Jarraian, koalizioak egin duen deklarazioa, hitzez hitz:
“Gaurko egun batean, 1936ko irailaren hamahiruan, tropa frankistak, bularrean eskapularioak, sorbaldan fusila eta pistola eskuan zutela, gure herrian sartu ziren, etsaitzat jotzen zituzten pertsona guztiei beldurrezko garai bat ezarriz; “gorri-separatista” zen haien espresioa. Ordenaren eta moralaren ideian oinarritutako erregimen bat, gizarte berri horren ardatz egituratzaile gisa, haiek ezarritakoa betetzen ez zuen guztia desagerraraziko zuena. Gizarte-kontrola ezarri zuten, haien praktiken menpe egonaraziz pertsona guztiak, gizarteak suntsituz, haien arma nagusia zena (eta dena)ren bidez: beldurra, kontrako jarrera adierazteko aukera soila ukatuz.
Beraien nagusitasunaren aurka egin zutenak beraien biktimak izan ziren. Zilegitasun demokratikoa defendatzen zutenak, balio errepublikanoak edo euskal klabean asmo nazionalak zituztenak, gure kasua izan zen bezala. “Desafecto” bezala izendatuak, errepresaliatuak izan ziren, eskulan esklabo bezala ustiatuak edo, are, “paseatuak” eta areka eta hobi komunetan desagertuak.
Gaur egun, 88 urte geroago, tradizio eta erregimen horren oinordekoak nola berpizten diren ikusten dugu, faxista berri hauek horrela aldarrikatzen baitute beren burua.
Gaurko faxistak ez dira gomina eta alkandora urdin edo beltza daramatzatenak bakarrik. Tatuaje, gimnasio, hooliganismo futbolero, exekutibo oinetako eta markako arropa zale dira. Sare sozialetan dabiltza nahi bezala, tabernako barran bezala, “pulserita” soinean dutela. Badirudi faxista hitzak berak bere sakontasuna apaldu duela. Ez dago soberan, bada, G. Fresserrek haietaz egin zuen deskribapen zehatza gogoratzea: “Faxistei faxista deitzen zaie beren herrikideekin klasistak izateagatik, etorkinekin arrazistak izateagatik, atzerritarrekin harroak izateagatik, emakumeekin matxistak izateagatik, ogasun publikoarekin lapurrak izateagatik, diktadura frankistaren historiarekin gezurtiak izateagatik, eta langileekin zikoitzak izateagatik”.
Geldi dezagun faxismoa!!
Izpiritu inkonformista eta errebelde baten oinordekook eta, batez ere, gizarte benetan aske eta gizatiarretan bizitzeko gogo ikaragarria dugunok, faxismoa gelditzeko deia egiten dugu han eta hemen, Oreretan-Errenterian, Euskal Herrian eta munduan! Konpromisoa hartzen dugu eta bakoitzak bere parte hartze esparrutik (kultura, lana, gizartea, politika, aisia…) faxismoa bere adierazpen eta esparru mental guztietan aktiboki geldiarazten laguntzera animatzen dugu”.
