Herri bat, Kalabazaren Bidean
Arrakastatsua eta beldurgarria izan da Errenteria-Oreretako Gau Beltza.
Kalabazaren Bidea, Gau Beltzaren barruan Errenteria-Oreretan. Beltzetan beltzena, eta jendetsua oso. Halakoa izan zen Errenteria-Oreretako Gau Beltza atzo. Orereta Ikastolak antolatu eta hamaika eragileren laguntzarekin jositako Kalabazaren Bidea izugarria izan zen beste behin ere. Izugarria, bat egin duen jende kopuruarengatik, batetik; eta izua zabaldu duelako kaleetan barrena, bestetik.
Lau Haizetara Euskaltzaleon Topagunea, Amulleta Danborraren Kofradia, Ereintza Dantza taldea, Herri Arte Eskola, Urdaburu Mendizale elkartea, Xenpelar AEK, eta Gaztañoko auzo elkartea, izan ditu ekintza antolatzeko lagun, iazko sareari eutsita.
19:30etan puntuan abiatu zen Santa Klara kaletik Kalabazaren Bidea. Kalabazaren gurdiarekin, Kuiandererekin, trikimako gaineko orekariekin, dantzaz zein musikaz eta kriseilu nahiz lastargien argipean egin zuten, mozorrotuta, uzta garaia agurtu eta neguan sartzeko Kalabazaren Bidea. Herri bat zen atzean, batzuk mozorro beldurgarriak soinean, eta beste batzuk, mozorrotu gabe, baina guzti-guztiak gozatzen.
Kalabazaren bidea jendetsua, baina bazterrean ere dozenaka lagun izan zituen beldurraren segizioak. Erdiko kale bazterra jendez gainezkoa, berdin Herriko Plaza, alondegia ingurua, baita Madalena eta Maria Lezo kaleak ere. Hasita ordubetera bukatu zuten herrian barrena egindako ibilbidea, Agirre Lehendakariaren plazan. Bertan zain izan zituzten Xenpelar AEK Euskaltegiko ikasleek erretako gaztainak, eta gainera, paper zatietara bildutako beldurrak erre zituzten sutan.
Bertaratutakoek gozatu, barrutik zein kanpotik gozatu zutela nabaria izan zen. Beldurraren ilunean argi utzi zuten: Errenteria-Oreretan, beldurrak jai du.
