Valeriano Lezetaren 'Alegoria' lana, kalera eramango dute ostiralean
50 urte bete ditu aurten Lezetak pleno aretoan jartzeko sortu zuen margolanak. Hainbat ekintza antolatu dituzte horren harira, eta ostiralean, lana kalera eramanda jarriko diote ginga urteurrenari bideomapping batekin.
Aizpea Oategi alkatea, gainontzeko alderdietako orezkariak, eta Herri Arte Eskolako Elene Carreto gaurko agerraldian, Valeriano Lezetaren murala atzean dutela. Udaleko osoko bilkura aretoan dagoen horma margoaren 50. urteurrena dela eta, kalera eramango dute artelan hori datorren ostiralean, hilak 8, herriaren iragana, oraina eta etorkizuna lotuz. Ez dute edozein modutan egingo, gainera, izan ere bideomappinga sortu dute Valeriano Lezeta pintorearen margolanaren urteurrena oroitzeko. Bideomappinga udaletxeko fatxada gainean egingo dute.
Gaur eman dute iniziatiba horren berri, pleno aretoan bertan Aizpea Otaegi alkateak, eta gainontzeko alderdi politikoetako ordezkariek Herri arte Eskolako Dantza Garaikideko irakasle Elene Carretorekin batera. Hark sortu du bideopmappinga eta emaitzarekin pozik azaldu da, “lehen aldia da halako zer edozer egiten nuela bideogintzarekin lotuta, eta esperientzia polita izaten ari da; izan ere, irakaslea naiz, baina baita sortzailea ere. oso interesgarria izan da, lehenik koreografia bat sortu behar izan dugulako. Ostiralean bideoan grabatutakoa, balkoietara ere eramango dute ikasleek. Ederra izango da benetan”.
Ikuskizun horrek, herriaren iragana, oraina eta geroa lotuko dituela jarri du nabarmen Otaegik, “hiribilduaren erdi aroko hastapenetatik hasi, industria garaiarekin jarraitu eta gaur den herri bizia erakusteraino”.
Proiekzioa ostiral arratsalde-gauean izango da, eta 15 minutu inguruko iraupena izango du, “bost emanaldi egingo dira, ordu erdiro bat. Lehen emanaldia 19:30ean, eta azkena, 19:30ean”.
Ostiraleko ikuskizuna udaleko departamentu ezberdinen arteko lankidetzaren emaitza dela ere aipatu dute agerraldian. Nabarmen jarri dute Herri Arte Eskolako kideek izandako parte hartzea, “Dantza garaikideko ikasleek udaletxeko fatxadan proiektatuko diren bideo dantzako piezak sortu dituzte”. Bestalde, arte plastiko eta ikusizkoetako ikasle gazteenek horma margoa aztertu ondoren, beren diseinuak sortu dituzte bideomappingaren proiekzioan txertatzeko, “ikasleen marrazkiak koreografiarekin uztartuko dituzte, adierazpen artistiko modu ezberdinak integratuz”. Ostiraleko ikuskizunaren atzean, hilabetetako lana.
Oraina, iragana eta etorkizunarekin lotuta
Ramon Mujika Errenteriako alkate izan zenak eskatu zion Valeriano Lezetari mural bat egiteko udaletxeko batzar aretoaren aurrealdean jartzeko. 1974. urtean izan zen hori, duela bost hamarkada; Xenpelar tailerren sustatzailea ere izan zen Lezeta. Egileak berak azaldu zuen urte hartako Oarso aldizkarian idatzitako artikulu batean, argi zuela murala ezin zitekeela bereizi batzar aretoak zuen funtziotik: “Biztanleriaren arazoak eztabaidatzen direnez, muralak herriaren orainarekin, iraganarekin eta etorkizunarekin lotura izan behar zuela argi zuen egileak”, azaldu du Otaegik. Errenteriaren aniztasunaren isla izatea ere ezinbestekoa zen egilearentzat.
Lezetaren omenezko ekintza ugari
Ostiraleko ikuskizuna urtean zehar egindako ekintzei ginga jartzeko ekitaldia izango da. Gogora ekarri du Otaegik, iazko udazkenean, batzar aretoan kokatutako murala zaharberritu zela. Halaber, Madalen sarietan jorratu beharreko gaia izan zuten 50. urteurrenaren harira Errenteria, lehena, oraina eta etorkizuna gaia. Hezkuntza komunitateak ere egin zuen bat urteurrenarekin eta Lezetaren lana hartu zuten oinarri Koldo Mitxelena ikastetxeko HLHko ikasleek Kuadro bat testu anitz ekintzaren barruan; Bizarin BHik ere horma irudian oinarritutako bideoa aurkeztu zuen euskal kultura ondarea zabaltzeko bideo lehiaketara.
2011ko azaroan zendu zen Lezeta.
Ostiraleko ekitaldian haren senideak izango direla jakinarazi du alkateak, “lehen emanaldian parte hartuko dute”. Herritarrak bat egitera deitu dituzte herriaren erabakigune den plenoa aretotik aterako dela mural ederra, batetik; lehenengoz egingo dutelako bideomapping bat Errenteria-Oreretan, bestetik: “eta ikuskizunak mereziko duelako zalantzarik gabe”.
