Emakumeen Etxea gertutik ezagutzeko, auzoetara
Emakumeen Etxea auzoetara gerturatuko dute hilabete honetan zein abenduan. Helburua, bere burua ezagutzera ematea da.
Emakumeen Etxea lepo, Maria Naredoren hitzaldia jarraitzeko. Argazkia: Mendi Urruzuno Emakumeen Etxea auzoetara gerturatuko dute hilabete honetan zein abenduan. Helburua, bere burua ezagutzera ematea da. Hala, udalak aurkezpenak egingo ditu erretiratuen klubetan, emakumeen elkarteetan eta auzo elkarteetan. Aurkezpenen helburua bikoitza dela azaldu du: “Batetik, proiektua ezagutaraztea eta eskaintzen diren zerbitzu eta baliabideen berri eman nahi dugu. Bestetik, auzoetan bizi diren emakumeen iritziak eta premiak jaso nahi ditugu”.
Beraun auzoan bihar, asteazkena, egingo dute aurkezpena, 18:00etan. Hilaren 13an, asteazkenarekin, Gabierrotako Laguntasuna Emakumeen elkartean egingo dute 16:00etan. Bi egun geroago, 15ean, Olibeteko Beti Bizkor elkartean egingo dute, 11:00etan; hilaren 20an, Alabergako auzo elkartean 18:00etan; eta hilaren 22an, Pontikako Lore Toki emakumeen elkartean 11:30ean.
Emakumeen Etxea zein Eskola Feminista aurkezteaz gain, inkesta bidez informazioa bilduko da bi errekurtso horiek auzo guztietara hobeto eta gehiago hurbildu ahal izateko. Online ere bete daiteke inkesta hori (egin klik hemen).
Emakumeen Etxean obrak
Obrak egiten ari dira Emakumeen Etxean eta udalak bide batez, gogora ekarri du lanak egiten dituzten bitartean, Olibet kaleko 6. zenbakira lekualdatu dutela.
2019an zabaldu zituen ateak Emakumeen Etxeak. Eskola Feministak, berriz, 2013an hasi zuen bidea Berdintasun Kontseiluak sortuta, eta 2014-2015 ikasturtetik aurrera urtero izan da martxan.
