Energia komunitatea osatzeko lehen saioa, Lezon
Aurrelanak eginda, komunitatea osatzeko lehen saioa astelehenean izango da, Kultura Aretoan. Udalaren laguntza du Iratzerrik, eta Goienerren aholkularitza.
Tinko jarraitzen du Iratzerrik Lezon energia komunitatea sortzeko bidearekin. Hurbilago dute helburua. Izan ere, komunitate hori sortzeko bideari ekingo diote hilaren 11n (astelehena) Kultura Aretoan egingo den saioan. 18:30ean hasiko da. Iratzerrik eta Lezoko Udalak bideratutako saioa da, eta Goienerreko kideek emango dituzte azalpen zehatzak.
Iratzerrik aurreratu du bai asteleheneko topagunea zein jarraian egingo direnak formazio izaerakoak izango direla, eta elebitan eskainiko dira. Hala, saio horietan komunitate bat zer den ulertu, eta Lezon sor daitekeenaren gaineko laguntza emango dute Goienerreko kideek. “Bilera arin eta dinamikoak izango dira, zuen interesa asetzeko aukera aparta”, azaldu du Iratzerrik.
Komunitatea sortzeko saioen aurretik lan eraginkorra egin du Iratzerrik. Adibidez, joan den astean herriko eragileekin euren asmoak partekatu zituzten klima larrialdia egoerarekin eta energia krisiarekin arduratuta dauden taldeko kideek. Horren aurretik, gainera, herritarrei inkesta informalak egin dizkiete, merkatariei informazioa eman diete, eta azkenik eragileen aurreko aurkezpena egin zuten. “Modu horretan, energia komunitatearen prozesua hasi aurreko fasea gainditu dugu”. Orain, komunitate horren zimenduak ezartzeko garaia iritsi da.
