Udal baratzetarako izena eman daiteke
72 udal baratze ekologikoren erabilera aterako dute lizitaziora. Hilaren 18ra arte eman daiteke izena.
Udal baratzetan lursail bat eskatzeko izena emate epea zabaldu du udalak. Gaztaño eta Agustinak auzoen artean dagoen Errenteriako Baratze Parkean 72 udal baratze ekologikoren erabilera lizitazio bidez esleitzeko deialdia zabalik da, eta hilaren 18ra arte eman dezakete izena horietako partzela bat eskuratu nahi dutenek. Baremazioaren bidez esleituko ditu udalak baratzeak, eta berdinketa izanez gero, zozketa publikoa baliatuko du.
Esleitzeko irizpideen artean, familia ugariek, langabezian dauden pertsonek, eta 18 eta 35 urte artekoek puntu gehiago jasoko dituzte. Baratzeak erabiltzeko lizentziak urtebeterako emango ditu udalak, eta gehienez ere bost urtez luzatu ahalko dira. 30 metro koadroko 41 baratze eta 60 metro koadroko 31 baratze daude. Partikularrentzako 72 baratze horiez gain, elkarteentzako beste lau daude.
Eskaerak online aurkeztu ahalko dira (klik egin hemen) edota presentzialki Zu! zerbitzuan. Eskaera orriak behera bezala bete beharko dira, baratze eskaeraren ereduaren arabera (Baldintza administratiboen agiria hemen klikatuta irakur daiteke).
Funtzionamendu arauek autokontsumora zuzendutako baratze parkea disfrutatzeko baldintzak arautzen dituzte (hemen klikatuta irakur daitezke).
