Abere itxitura eta pasabide kanadarra eraikiko dituzte Aldura-Igantziko larrean
Mendiko larreek ekosistema bat osatzen dutela ere azaldu du udalak, eta habitat horien kudeaketa garrantzitsua dela.
Añarbeko Aldura-Igantziko larrean inbertsioa berriak egingo ditu udalak. Zehazki, 1.000 metroko abere itxitura eta pasabide kanadarra eraikiko ditu bertan. Lehen fasean aipatu larre eremuan, Malbazarreko lepoaren eta Burkondoko bordaren artean hasi dira itxitura egiteko lanekin. Lehen fase horren barruan, pasabide kanadarra eta langak eraikiko dituzte, pertsonak eta bizikletak errazago igaro daitezen, eta aldi berean, azienda Añarbeko edo Oberan-Urdaburuko Eboluzio Naturaleko eremuetan sar ez dadin, Donostiako lurretan kalte gehiago egin ditzaten ekiditeko.
Aiako Harriko Eboluzio Naturaleko Eremuetan, besteak beste Añarbeko pagadietan eta hariztietan, ikerketa zientifikoa eta erabilera publikoa baimentzen direla soilik jakinarazi du udalak, “Aldura-Igantziko udal larreari dagokionean, berriz, gaur egun denera latxa eta sasi ardi arrazetako bederatzi artaldek dute igotzeko baimena”.
Mendiko larreek ekosistema bat osatzen dutela ere azaldu du udalak, “gizakiak sortu eta mantendu ditu horiek abeltzaintzaren bidez, eta mehatxutzat jotzen dira Europan, abeltzaintza estentsiboa eremu menditarretan uzten ari delako”. Hori horrela, habitat horien kudeaketa garrantzitsua dela jarri du nabarmen.
