Gaur hasiko da Poesia Kaia
Tere Irastortzak eta Joseba Sarrionandiak solasaldi poetikoa eskainiko dute Gezala Auditoriumean, 19:00etan. Larunbatean izango da bigarren saioa.
Laugarren Poesia Kaiak gaur hasiko du bidea. Solasaldi poetikoa partekatuko dute Tere Irastortza Garmendiak eta Joseba Sarrionandia Uribelarreak Gezala Auditoriumean, 19:00etan hasita. Bertarako (eta hilaren 16ko bigarren ekitaldirako) sarrera doan da, baina txartela eskuratu behar da Gezalako aforoa neurtze aldera.
Bigarren ekitaldia larunbatean jasoko du herriko antzokiak. 19:00etan hasita, poesia errezitaldia egingo dute Garazi Ugalde Pikabea lezoarrak, Beñat Arruti Irigoienek eta Juan Carlos Mestrek. Olerkariak laguntzen, errezitaldiaren bukaeran, Itsasne Fernandezek (klarinetea), Jon Makusok (bibolina) eta Tomas Rutik (fagota) musika saio laburra eskainiko dute.
Astelehenean aurkeztu zuten Poesia Kaiaren laugarrena Jon Legorburu Kultura zinegotziak eta Juan Ramon Makuso poetak. Legorburuk azaldu zuen euskal poetak eta musikariak bilduko direla Lezon bi egunez, eta egitasmoaren helburua dela “poesia sozializatu eta herritarrengana hurbiltzea”.
Juan Ramon Makusok, bere aldetik, nabarmendu zuen Poesia Kaiarekin Lezon poesia eta kulturaren aldeko “plaza sendoa” lortu dutela: “Helburua poesia sozializatzea da, izan ere, jendeak ez du ohiturarik poesia entzuteko, eta pozgarria da Lezoko Udalak egiten duen esfortzua”.
