Ahalegina eta ikuskizuna izotz gainean
Txuriberriren partaide dira Oarsoaldeko zortzi kirolari gazte. Asier Pardavila lezoarraren arabera sakrifizio handia eskatzen duen kirola bada ere, lortzen den emaitza ikusgarria da.
Ikuskizunak ere egiten ditu Txuriberrik. Iazkoarena da irudia. D. Fernandez Ezin da esan izotz gaineko irristaketa artistikoa kirol ezezaguna denik. Aldi berean, Euskal Herrian ez dituela jarraitzaile sutsu asko esan daiteke. Ospea duen kirola da, baina aldi berean urrun gelditzen den horietakoa, lantzean behin telebistan gustura ikusten denetakoa, nazioarteko txapelketa handiren bat denean batik bat. Bada, Oarsoaldean kirol horrek baditu ordezkariak, eta horietatik zortzi Donostiako Txuriberri Izotz Klubean daude. Gainera, Asier Pardavila lezoarra da bertako presidente. Kirolari horiek egiten duten ahaleginaz, desorduetan egiten dituzten entrenamenduez, eta horrek guztiak dakarren gozamen eta ikuskizunaz hitz egin du.
Ehari Iturri Prieto, Erai Iturri Prieto eta Kellan Iturri Prieto oiartzuarrak; Leire Garcia Ibarguren, Lur Araneta Bandres eta Chloe Diez Martin errenteriarrak; eta Elma Goikoetxea Zabaleta nahiz Maialen Pardavila Estevez lezoarrak dira Oarsoaldeko ordezkariak Txuriberrin. 8 urtetik 23 urtera artekoak dira denak. Agian, kirolari kopuru aldetik izotz gaineko irristaketa artistikoa masa kirola ez izatearen arrazoia izan daiteke hura praktikatzeko izotz pista bat behar dela, eta Gipuzkoako bakarra Donostiakoa dela: «Horrek desorduetan entrenatzea dakar. Pista beste kirolari askorekin partekatu behar dugu. Oso kirol gogorra da, sakrifizio handia eskatzen du, ordu asko. Mailarik altuena duten kirolariak 21:00etatik aurrera entrenatzen dira, adibidez. Oso gustuko izan behar duzu aurrera egiteko. Baina bereganatzen zaitu».
Txuriberrin 54 kirolari daudela zehaztu du Pardavilak, Gipuzkoako hainbat herritakoak. Jada 30 urteko bidea du egina klubak. «Irristaketa zer den irakasteaz gain, konpetizioetan ere aritzen gara. Baina balioak dira gure oinarria: errespetua, diziplina, lana eta ahalegina dira oinarri horiek. Nola ez, gozamena eta ondo pasatzea ere bilatzen ditugu», aitortu du Pardavilak. Gainera, curling sekzioa ere badutela nabarmendu du lezoarrak, «arrakasta du modalitate horrek». Irristalari gazteenak eskolarteko lehietan izaten dira; koskorragoek hurbileko eta estatuko txapelketetan parte hartzen dute. Mailarik gorenean dituzten kirolariak Iker Oiartzabal (Espainiako selekzioarekin aritzen da nazioarteko txapelketetan) eta Nahia Olaizola dira, azken hori Espainiako txapeldun Junior Mailan.
Pardavila alabagatik hasi zen izotz gaineko irristaketa artistikoa ezagutzen. Kirolean hasi zen Maialen alaba, eta maiz gertatzen den bezala, gurasoak ondoan behar zituen entrenamenduetara eta bestelakoetara joateko. «Gauza batek bestea dakar. Pixkanaka klubean ardurak hartzen hasi nintzen, presidente izateraino. Halakoak dira talde amateurrak…», zehaztu du.
Ikuskizuna
Kirol lehietan aritzeaz gain, urtean zehar egiten duten guztia konpartitzea dute helburu Txuriberrikoek, gozatu eta jendeari gozatzeko aukera ematea. Hala, urtero, Eguberrien testuinguruan ikuskizunak lantzen dituzte, «lehien sasoian etenaldia egin, eta ikuskizun bat landu eta jendartera zabaltzen dugu. Oso ikusgarriak izaten dira». Aurten, abenduaren 28an (15:00) eta 29an (11:00), nahiz urtarrilaren 3an (21:00) egingo dute ikuskizun hori, Peter Pan eta maitagarrien erresuma izenekoa. Sarrerak 15 euroan eros daitezke Donostiako Txuri Urdin izotz jauregian, han bertan izango baitira horma gaineko hiru ikuskizun horiek.
«Oso berezia da ikuskizun hori guretzat. Koreografia oso politak, patinatzaileen karakterizazio ikusgarria, musika, artea… Ederra izaten da. Mereziko du han izatea. Joaten direnak ez dira damutuko. Lan handia dago horren atzean», adierazi du Pardavilak.
Ondoko irudietakoak, Txuriberrin diren Oarsoaldeko ordezkariak dira.
