Hamabi zuzenketa aurkeztu dizkio EAJk aurrekontu proiektuari
Denera 879.000 euroko igoera suposatzen dute zuzenketa horiek; hitz egin eta adostasunetarako prest azaldu dira jeltzaleak.
Murua eta Oiarbide gaur eguerdian egindako agerraldian. Udal aurrekontu proiektuari zuzenketak aurkeztu dizkio EAJk. Denera 879.000 euro gehiago bideratzea suposatzen du proposamenak, eta hamabi zuzenketa dira proposatu dituztenak. Elixabete Murua eta Luis Mari Oiarbidek eman dituzte xehetasunak gaur eguerdian egindako agerraldian. Murua, jeltzaleen bozeramaileak azaldu du ez duela euren alderdiak osoko zuzenketarik aurkeztu, “hala ere proiektuan gabezia batzuk antzeman ditugu, eta horiek zuzentzen saiatuko gara aurkeztu dizkiogun zuzenketekin”.
Zuzenketak, udal baliabideak lehentasunezkotzat jotzen dituzten arloetara bideratzen saiatzeko egin dituztela gaineratu du Muruak, eta garrantzitsuenak nabarmendu ditu. Hala, gizarte zerbitzuen arloan, zahartze aktiboa sustatzeko programa garatzea proposatu du EAJk, eta horretara 50.000 euroko diru zatia bideratzeko eskatu. Hirigintza arloan, EITak eta birgaitze lanak egiteko diru laguntzak herritar guztiei zabaltzea; auzoen araberako diagnostikoa egitea (50.000 euro); eta etxebizitza hutsaren azterketa egitea (25.000 euro).
Lehen sektoreko ekoizleentzako online salmenta plataforma garatzea da egin duen beste zuzenketa, eta horretara, 60.000 euro bideratu bere zuzenketa proposamenean. Mugikortasun eta segurtasun arloetan ere egin dute proposamena jeltzaleek: Puntu ilunen eguneraketa egitea eta horietan esku hartzea proposatu dute batetik, eta Pontika-Igantziko igogailua eraikitzeko elhen fasea aurreikusi beharrean, proiektu osoa egitea proposatu beharrezko diru zatia gehituta, “gobernu taldeak lehen fasea egiteko 700.000 euro aurreikusi ditu; guk hasi eta bukatzea proposatzen dugu, eta 1.100.000 bideratzea eskatu”.
Led argiteri publikora 80.000 euro, eta bizikleta elektrikoak alokatzeko zerbitzua ezartzeko 84.000 euro bideratzea ere eskatu dute.
Gazteria eta kirolarekin lotutakoak dira azken zuzenketak. Horrela, gazteak emantzipatzeko udal baliabideen etengabeko ebaluazioa egitea eta 35.000ko diru zatia bideratzea proposatu dute, eta teknologia berrien erabilera egokirako prebentzio eta sentsibilizazio kanpainak egitea (15.000 euro). Azken zuzenketa, kiroldegietako makineria berriztea da eta horretara 80.000 euro bideratzea proposatu dute jeltzaleek.
Agerraldian aurkeztutako proposamena gobernu taldeari helarazi dio EAJk, “adostasunetara heldu eta hitz egiteko prestutasun osoa dugu”, esan du bukatzeko Muruak.
