Sei kultur ekintzaile ari dira Sortu eta ekin programan
Agustinak Zentroak aspaldi jarri zuen martxan programa hori Kultura eta Sormen Industriak KSI bultzatzeko.
Agustinak Zentroak berak kudeatu eta sustatutako Sortu eta Ekin Programaren barruan ari diren kultur ekintzaileen berri eman du. Kultura eta Sormen Industriak (KSI) bultzatzea du helburu programa horrek, eta ekintzaileei zuzenduta dago, euren proiektuen lehen faseetan, “horiei laguntza ematea da helburua, prestakuntza, orientazio pertsonalizatua eta networkingerako aukerak emanez, haien proiektu ideiak finkatu eta negozio jasangarri bihurtzeko”.
Une honetan sei ekintzaile ari dira Agustinak Zentroan programa horren barruan. Leticia Padrones Gil, bertan ari da Etxe Faktoria proiektuarekin, bizipenak sortzen. Artisau ikaskuntza introspekzioarekin eta ongizatearekin uztartzen duen espazio berritzailea dela azaldu dute. Helburua, berriz, artisautzaz, autoezagutzaz eta ekintzailetzaz interesa duten pertsonak elkartzea du.Etxe Faktoria iraganarekin birkonektatzeko eta norberaren jabetzak artisau sorkuntzaren bidez baloratzeko gonbidapena da.
Angel Blanco Egoskozabal Aestudiorekin ari da bertan. Diseinu grafikoa lantzen du bertan, kultur erakundeekin eta enpresa pribatuekin elkarlanean, “identitate bisualetik hasi eta diseinu editorialerainoko lana egiten du.
Iratxe Goñi Aranzabalek Yelo proiektua du bertan, eta haurrentzako produktu inklusiboak garatzen ditu. Musika proiektua du Jon Mitxelena Piñeirok, bere aldetik, eta musikarako sarbidea demokratizatu eta adierazpen artistikorako bide bat zabaldu nahi du.
Leire Mendizabal Pagolak ilustrazio proiektua du martxan, eta Aitor Aranguren eta Erik Suso, Muga proiektua ikus entzunezko proiektuarekin ari dira.
Prestakuntza hilaren 29ra arte egingo dute, eta parte hartzaileei beren proiektuak abian jartzeko eta sendotzeko behar dituzten ezagutza eta baliabideak emango dizkiete.
