Hibaikaren marea beltza, inoiz baino biziago egiteko
Oinarrizko kategorietako arraunlariei aitortza egin nahi die Hibaika Egunak, baita Oiartzun ibaitik jauzi egin eta herriko kaleak hartu ere, «garena herriarekin batera ospatzeko».
Hibaika Egunaren aurkezpena. Oiartzun ibaitik eta egoitza duen Mataderotik jauzi egin eta Errenteria-Oreretako kaleak hartuko ditu Hibaika Arraun Elkarteak bihar. Lehenengo Hibaika Eguna antolatu du, helburu bikoitza betetzeko: harrobiari aitortza egin nahi dio, batetik; herriarekin sareak sortu eta harremanak estutu, bestetik.
Hilabete hasieran egin zuten egun osoko jai handiaren aurkezpena, eta hitza hartu zuten arraunlari guztien eta klubaren izenean Elene Telletxea Iarzabal eta Alejandro Fariña Roma arraunlariek. Argi adierazi zuten biek «herritik eta herriarentzat» diharduela lanean eta Errenteria-Oreretaren izena «harro» zabaltzen duela Hibaikak lau haizetara, «Emakume Seniorren arraunaren gorenetik Euskotren Ligan, Gizon Seniorren KAE2 Ligan, eta elkartearen harrobia diren Kimu, Haur, Kadete eta Gazteekin batel txapelketetan». Gaur-gaurkoz, 100 arraunlari ari dira Errenteria-Oreretako arraun elkartean kategoria ezberdinetan.
«Herri izaera» horretan sakontzeko ariketa izango da Hibaikarentzat biharko eguna, baita harrobiari aitortza egiteko eguna ere: «Izan ere, sinistuta gaude arraunlari gazteenek merezi dutela elkartearen aitortza, baita herriarena ere». Argi esan zuten biek ala biek, «arraunlari horiek, harrobia, Hibaikaren etorkizuna dira». Ezinbestekoak dira arraunlariak, baina horiek bezala, zale, bazkide eta babesleak ere «beharrezkoak» dituztela jarri zuten nabarmen: «Ederra da babes hori bandera bat etxera ekarri, edota lorpen batekin herrira iristen garenean jasotzea; zer esanik ez, emaitzak hain aldeko ez direnean marea beltzaren babesa barru-barruraino heltzen zaigunean».
Biharkoa, zerrenda luze baten lehen Hibaika Eguna izango da, «gelditzeko dator-eta».
Egun osoko egitaraua
Egun osoko egitaraua ondu dute egun handirako, zabala eta askotarikoa. Hala, 10:00etan hasiko dute egitaraua Koldo Mitxelena ikastetxeko jolastoki estalian antolatu duten ergometro txapelketarekin; probatu nahi duen orok izango du aukera lehian aritzeko. Haurrentzako jolasak ere antolatu dituzte leku berean. Ondoren, arraun erakustaldia egingo dute Hibaikako arraunlariek Oiartzun ibaian, Lekuona pareko egurrezko zubiaren inguruan, 11:00etan hasita. Familia argazkia egingo dute 12:30ean, eta 13:30ean, berriz, harrobia aurkeztuko du Hibaikak Koldo Mitxelena ikastetxeko jolastokian.
Bazkaria ere ez da faltako. Merkatuzarren izango da 14:30ean, eta 150 lagunetik gora elkartuko dira bertan; txartelak erosteko aukera asteartean itxi zuten antolatzaileek. Iker Rodriguez DJak girotuko du bazkalostea.
Agerraldia, «ezinbestekoa» duten babesa eskatzeko ere baliatu zuten Hibaikako bi arraunlariek, eta biharko egunarekin horretan sakonduko du Errenteria-Oreretako arraun elkarteak: «Gero eta handiagoa egin nahi dugun marea beltzaren tanta izan zaitezten eskatu nahi dizuegu herritarrei: estropadetara Hibaikaren koloreekin animatzera etorrita, babesle izanda, edota bazkidetuta». Azken horretarako, Hibaikaren salmenta puntu ofiziala den Rosmi dendara joan eta bazkidetza orria bete baino ez dela egin behar azaldu zuten Fariñak eta Telletxeak, «arraun elkartea babestearekin batera, Hibaikaren materiala erosterakoan beherapenak, eta bestelako abantailak jasoko ditu bazkideak».
Gonbidapen zabalarekin bukatu zuten, herritarrei irekiak baitira antolatutako ekintza guztiak: «Herritar guztiak animatu nahi zaituztegu gurekin bat egitera, Hibaika Eguna elkarrekin ospatzera; herri bat, traineru bat izatera. Gonbidatuta zaudete guztiak».
