Indarkeria matxistaren "diskurtso ukatzaileetan" jarri du arreta udalak
Adierazpen instituzionala egin du Errenteriako Udalak Azaroaren 25ari begira. Indarkeria matxista ukatzen duten diskurtsoetan jarri du fokua, eta nabarmendu du, hazten ari dela joera neomatxista.
Adierazpen instituzionala egin du Errenteriako Udalak Azaroaren 25ari begira. Indarkeria matxistaren kontrako nazioarteko egunaren bezperetan, indarkeria matxista adierazpen ororen kontrako “gaitzespen irmoa” adierazi, eta hura desagerrarazteko lanean jarraitzeko konpromisoa berretsi du, “beste erakunde batzuekin, mugimendu feministarekin, eta gizarte osoarekin koordinatuta”.
Indarkeria matxistaren diskurtso ukatzaileetan jarri du fokua udalak, eta ultraeskuinaren aurrerakadaren testuinguruan kokatu ditu. Halaber, nabarmen jarri du, nahiz eta gero eta kontzientzia eta sentsibilizazio kolektibo handiagoa egin indarkeria matxistarik gabeko gizarte baten alde, joera “neomatxista” hazten ari dela: “Batez ere mutil eta gizon gazteengan eta adin ertainekoetan, eta bereziki, eremu digitalean. Manosfera deitu zaion eremuan, ugariak dira mezu misoginoak eta berdintasunaren aurkakoak”.
Diskurtso horren aurrean, emakumeen aurkako indarkeria matxistaren datuak aipatu ditu, “horiek gogorarazten digute gure gizarteak egiturazko arazo bat duela, emakume eta gizonen arteko desberdintasunean oinarritzen dena”.
Adierazpenean, halaber, hamar puntu zehaztu ditu udalak eta herritar guztiak deitu ditu Azaroaren 25aren harira Oreretako Mugimendu Feministak deitutakoetan parte hartzera. Adierazpen instituzionala hitzez hitz irakurtzeko egin klik hemen.
