Teknologia libreak eta ekonomia sozial eraldatzaileak Torrekuan eraiki dute talaia
Euskal Herriko Teknologia libreei eta ekonomia sozial eraldatzaileari lotutako espazio kooperatibo eta komunitarioa izango da Torrekua aurrerantzean.
Torrekua teknologia libreen talaia gisa ateak zabaldu zitueneko ekitaldiko argazkia. Torrekua Euskal Herriko Teknologia libreei eta ekonomia sozial eraldatzaileari lotutako espazio kooperatibo eta komunitarioa izango da aurrerantzean. Gaur zabaldu ditu ateak egiteko berri horrekin—ez nolanahikoa— modu ofizialean. teknologien gaineko ikuspegia eta harremana partekatu, sortu, trebatu, esperimentatu eta eraldatzeko lekua da, eta hori egiteko, oinarri-oinarrian ikuspegi sozial eta komunitarioa baliatzen dutela azaldu dute.
Torrekua “etapa” berria hasiko duela gaur azaldu dute TEKSeko kideek gaurko aurkezpenean, “TEKS elkartea, udala, UEU Udako Euskal Unibertsitatea, eta KZ Gunearen elkarlanari esker. Aizpea Otaegi alkateak hartu du hitza lehenik, eta 2016an ateak zabaldu zituenetik egin duen ibilbidea gogora ekarri du lehenik, “bere sorreratik pentsatu zen erreferentziazko espazioa izan zitekeela teknologiaren eremuan, kultura eta artisautzaren bueltan ekintzailetasuna gauzatu nahi zuten proiektu eta pertsonentzat, beti ere ekonomia sozialean fokua jarrita”. Gaurkoarekin Torrekuak “garai berri bat” hasiko duela erantsi du, eta garai berri horretan, eraikinari eta batez ere bertan egosten denari “dimentsio herritarra” eman nahi izan diotela zehaztu.
Torrekua “itsasargia” izatea nahi dutela ere esan du udal agintariak, “Euskal Herri osarentzat teknologia libreen eta ekonomia sozialaren esparruan, bide emango diena askotariko proiektuei; izan enpresa proiektuak, izan elkartegintza esparrukoak, edo izan ahalduntze herritarrarekin lortutakoa”. Esperimentua dela aitortu du, hasi dutelako bidea zein fruitu emango dituen jakin gabe, “baina hori dena interesgarritzat jo dugu honetan inplikatuta gauden guztiok”. Harago jo du, “demokrazian sakontzeko ariketa” dela esan du, “digitalizazioaren esparruan demokratikoagoa izango den ikuspegi bat garatu nahi dugulako, ekonomia esparruan ere demokratikoagoak izango diren harremanak eraikitzeko erreferentziazko espazioa egin nahi dugulako eta azkenik, harreman publiko komunitario horretan ere esploraziorako bide bat zabaltzen duguna udal gisa guretzat oso interesgarria dena”.
“Bide urratze” horretan parte diren erakundeei esker ona adierazi die Otaegik bukatzeko, “Torrekuaren orrazkera berri honi, gure ongi etorririk onena eta zorterik onena bertan ariko diren eragile guztiei”.
Torrekuak izan nahi duenaz aritu da ondoren, Mattin Solis Talios Koopeko kidea. Burujabetza teknologia sustatuko duen espazioa izango da, “interpretaziorako eremua ekonomia sozial eraldatzailearekin batera”. Gaur ofizialki zabaldu badute ere, hilabeteak daramatela bertan lanean, formazioak antolatu eta zerbitzuak eskaintzen azaldu du Talaioseko ordezkariak eta helburu behinenak aipatu ditu: Teknologia digitalak sustatzea ahal dela teknologia burujabea bultzatuz ekonomia sozialaren eta teknologia libreen ikuspegitik; gobernantza eredu komunitario, interkooperatiboa eta partaidetzazkoa izatea; lan partaidetza hori sustatzeko espazioa izatea; eta Torrekuaren bidez komunitate hori guztia bultzatzea, herritik hasi eta Oarsoalderaino, eta Euskal Herrira zabalduta.
Gaur gaurkoz TEKS —eta horren barruan ari diren Bikonet, Abaila, eta Talaios— KZ Gunea, Euskal Herriko Moneta eta UEUk osatzen dute Torrekuaren komunitatea. Horietako batzuk, beraien proiektua aurkeztu dute, eta solasaldia zabaldu dute ondoren. Jatekoa eta edatekoa ere ez da falta izan inaugurazio ekitaldian; Lakari Koop arduratu da egiteko horretaz.
Torrekuaren gaineko erreportajea argitaratu du gaur Gipuzkoako Hitzak (Klik hemen irakurtzeko).
