Hibaika duelako zortedun da Errenteria-Orereta
Hibaika Arraun Elkartearen eguna egiten ari dira gaur Errenteria-Oreretan. Zortedun da herria halako kirol elkartea izateagatik, eta herria han eta hemen ordezkatzeagatik.
Gabonetako loteria salgai du Hibaika Arraun Elkarteak. 54.640 zenbakia du inprimatuta zoriontasuna eta oparotasuna eman dezaketen tiketetako bakoitzak. Herriko eta kanpoko hainbat tokitan eros daitezke abenduaren 22an izango den zozketako paper puskak. Bada, zortearen ufada itxaron gabe, Errenteria-Oreretak jada badu sari potoloa irabazita: Hibaika Arraun Elkartea tokatu zaio. Bost euroko prezioa dute loteriako txartel horiek, horietatik lau zozketan jokoan jarriko direnak dira, eta bestea Hibaika laguntzeko da. Matematikek eta estatistikek diote oso-oso-oso zaila dela Gabonetako loteria egokitzea. Bada, zoriak kontrakoa esan bitartean, goza dezatela txartela erosi dutenek, Errenteria-Orereta osoak, eta nahi duten guztiek arraun klubarekin, horren ordezkari diren arraunlariekin, eta elkargo belztiarraren komunitatea osatzen duten den-denekin: herriko arraun elkartearekin, Hibaika. Hori bai hori dela loteria tokatzea. Herriko loteria, eta herriarentzat.
Lehen Hibaika Eguna egiten ari dira gaur herrian. Zortea du Errenteria-Oreretak hain kirol elkarte oparoa izateagatik, estropadak ez direnean ere herrigintza bokazioa ez baitu uzten albo batera Mataderoko klubak. Askotariko ekintza, ekitaldi eta saltsa giroko jarduerak antolatu dituzte goizean: ergometro txapelketa, haurrentzako jolasak, Oiartzun ibaiko arraun erakustaldia, familia argazkia… Baina eguneko lehen intentsitate handiko tontorra 13:30ean hasi da, Koldo Mitxelenako jolastoki estalian harrobiko talde guztietako kideak aurkeztu dituztelako Maddi Insausti eta Alejandro Fariña arraunlariek. Kimu, Haur, Kadete eta Gazte mailatako neska-mutilak Beraun trainerillaren atzean zegoen bi koskako oholtzara igo dira euren izenak entzun ahala; baten batek publikotik oholtzarako bidea hasterakoan irteera baliogabea egin du, baina tira, inork ez du tupust egin eta izan diren irribarre bakarrak zorionarekin harremandutakoak izan dira. Dozenaka eta dozenaka elastiko eta izerditako beltz izan dira agertoki horretan, izan arraunlari edo entrenatzaileenak. Datua eman dute aurkezleek: klubaren kategoria guztietako arraunlariak bat eginda, 100 kirolari ditu orotara Hibaikak. Harrobiaren aitortzarako eguna ere izan da gaurkoa.
Ekitaldi serioaren ondoren, bazkaria Merkatuzarren. 181 lagun elkartu dira. Herriari zabalik den elkartea dela esan dute maiz arraun elkarteko agintariek. Udalerrian apurka haren harrabotsa handiagoa dela ezin uka daiteke. Egia da ere kirol arloan klubak izan dituela gertuko denboraldiak baino askoz hobeak, baina oso-oso nabarmena da Errenteria-Oreretako kirolean erreferente oso indartsua dela taldea, eta herrialde nahiz Euskal Herri mailan ere aski ezaguna dela klubaren izena eta egitekoa. Marea beltza dute ondoan bultzaka Kimu Mailakoetatik hasi eta seniorretara arte herriko koloreak ordezkatzen dituzten arraunlariek. Gaur batez ere lehorretik egin dute arraun, Hibaika Egunaren izaera jada erreferentzia den kirol elkartea are ikusgarriago eta ukigarriago bihurtzea baita. Ziur, Merkatuzarreko bazkariko postre garaian, edo Iker Rodriguez DJaren kantu eta kantu artean, Hibaikazaleak zorionez duten kirolarien oparotasun horretaz, indarrak batzearen eta horiek egoki bideratzearen garrantziaz, eta etenik gabe handitzeaz eta zabaltzeaz hitz egin dutela. Loteriaz ez dute hitz egin, jada badutelako esku eta tosta artean gordoa: Hibaika.
Jarraian ikus daitezkeenak eguerdiko harrobiko arraunlarien aurkezpeneko eta Merkatuzarreko bazkariko irudiak eta bideoa dira.
