Apostasiaren aldeko mezua zabaldu dute
Memoria historiko feministaren jardunaldiak antolatu direla baliatu dute apostasia egiteko eskatzeko herriko emakumeei.
Atzo egin zuten informazioa zabaltzeko inizitaiba Emakume Askeak taldeko kideek, Herriko Plazan eta Zumardian. Argazkia: Emakume Askeak Euskal Herriko emakume guztiei apostasia egiteko eskatu zien atzo Errenteria-Oreretatik Emakume Askeak talde feminista anarkista eta autonomoak. Udalerriko memoria historiko feminista berreskuratzeko jardunaldiak antolatu dituzte Azaroaren 25aren harira Errenteriako Udalak eta Berdintasun Kontseiluak, eta hori baliatuta egin dute apostasiaren aldeko informazio zabaltzea Emakume Askeak taldekoek.
Hainbat argudio eman ditu talde horrek emakumeak apostasia egitera deitzeko. Hala, eliza, erakunde atzerakoia, sexista eta patriarkala dela jarri du nabarmen, “historian zehar emakumeen zapalkuntza, bortxaketa, eta hilketetan parte hartu duen etsairik handiena da. Gizonen instituzioa da eta emakumeok bigarren mailako pertsona gisa ikusten gaitu”.
Talde horretako kideek ateotzat jo dute euren burua, eta argi esan dute, gauzak horrela, ez dutela eliza eta jainkorik nahi eskoletan, telebistan eta espazio publikoetan, “pertsonen arteko diskriminazioa eta bazterketa bultzatzen dutelako eta guk berdintasunean sinisten dugulako”. Muturreko ideologia “ultrakontserbadorea” egotzi diote, gainera, elizari, emakumeentzat “garrantzi bizikoak” diren hainbat gauetan: abortua, sexualitatea, inklusioa eta inmigrazioa, kasu. “Estatuak elizari ematen dizkion pribilegio juridiko eta fiskalekin ez gaude ados, bestalde”, esan dute, eta horren harira azaldu dute OHZ Ondasun Higiezinen Zerga ordaintzetik salbuetsita dagoela, eta inmatrikulazioei esker 4000 ondasun publiko baino gehiago bereganatu dituela.
Apaizek haurrei egindako sexu abusuak aipatu dituzte azkenik apostasia egiteko arrazoi gisa, “apaizen mozorroaren atzean, pederastak daudelako eta mojen mozorroen atzean, haurtxoen lapurretak, bortxaketak eta abar”.
Apostasia egitea “ekintza bat besterik” ez dela, eta taldearen helburu nagusiena “eliza suntsitzea” dela jarri dute nabarmen; ez hori bakarrik, “herriari lapurtutako lurrak eta herritarren izerdiarekin eraikitako onasunak herriari itzultzea exijitzen dugu”.
