Sanmarkoseneko langileak eta Duintasuna eskutik, bizitza duinen alde
Sanmarkoseneko langileak greba mugagabean dira Gureakek ezarri nahi dizkien lanaldi murrizketak eta bost langileren kaleratzea ekiditeko. Duintasunaren hileko lehen asteleheneko mobilizazioarekin bat egin dute grebalariek.
Sanmarkoseneko langileen protesta bere egin du Duintasunak gaur. Sanmarkosene zaharren egoitzako langileek eta Duintasuna pentsiodunen elkarteak bat egin dute gaur, eta protestak batu. Horrela zaintza publiko duinaren beharra jarri dute agerian batzuek eta besteek, eta horren oinarrian, ezinbestean jarri lan baldintza duinak, lan baldintza kaskarrek, zaintza kaskarra ekarriko baitu ezinbestean. Sanmarkoseneko langileek eta euren pankartak zabaldu du protesta; atzean, Duintasunaren pankartak hartu du lekua eta erdialdean barrena zabaldu dute protesta.
Emakumeen pentsioez mintzatu da gaur Duintasuna, berriz ere, pentsio arrakala nabarmen jartzeko: “Emakumeek lantokietan duten diskriminazioak eta prekarietateak, langabezia tasa handiak, lanaldi partzialeko kontratuen proportzio handiagoak, eta aitortu eta ordaindu gabeko zaintza lanetan aritzeak dakar pentsio baxuenak jasotzea”. Zaku horretara sartu ditu halaber, alarguntza pentsioak.
Bizitza duinak bermatzeko ezinbestekoa da arlo ekonomiko horri erantzun eta pentsio baxuenak osatzea kolektiboaren hitzetan, baina, era berean, ezinbestekoa dela zaintza sistema publiko kalitatezkoa izatea jarri du nabarmen, dauden zaintza beharrak behar bezala, duin eta kalitatez beteko dituena”. Argi esan dute Greba Feminista Orokorrak agerian jarri zuena duela urtebete, baita mugimendu feminista azken urteetan aldarrikatzen eta iraultzea eskatzen ari dena ere, zaintza sistemari emakumeek eusten diotela, “eta egoera horri buelta eman behar zaio, sistema hori ezin baita doako lanean edo soldata eta lan baldintza bidegabeetan oinarritu”.
Egoera hori nola irauli badagoela jakitun dira, eta zaintza publiko komunitarioan jarri dute fokua: “Euskal Herriko hainbat herri eta hiritan garatzen ari diren esperientzia eta prozesu zehatzetan sakondu dugu, eta partekatutako esperientzietan ikusi dugu aldaketa hori praktikan jar daitekeela”. Hori horrela, emakume pentsiodun guztiak animatu dituzte mugimendu feministarekin eta beste gizarte kolektibo batzuekin parte hartzera halako gogoeta eta partekatzeetan.
Zaintzarekin “negoziorik” ezin dela egin esan dute bukatzeko, “horrela den bitartean, mobilizazioa da bide bakarra”.
11 eguna greban
Joan den ostiralean agerraldia egin zuten Sanmarkosenekoe goitzako langileek, eta gogorarazi egin zituzten greba mugagabera eta aurretik egindako borrokaldietara eraman dituzten arrazoiak: “Enpresak 20 langileren lanaldia murrizteaz gain, horietako bost kaleratzea proposatu du”. Hori ez da guztia, izan ere, nabarmen jarri zuten gaur gaurkoz, langileen %36k borondatezkoak ez diren lanaldi partzialak dituztela, eta horrek arriskuan jartzen duela, oraindik ere, erabiltzaileek merezi duten arreta. Langileen egonkortasun ekonomikoa eta lana eta familia arteko kontziliazioa eragozten duela ere salatu dute.
Honakoak dira Sanmarkoseneko langileen eskaera nagusiak: bost kaleratze horiek bertan behera uztea, “langileen falta larriagotuko lukeelako, eta zerbitzua are gehiago konprometituko lukeelako”; Langile guztientzat lanaldi osoko kontratuak bermatzea, “arretan egonkortasuna eta jarraikortasuna sustatuz”; eta, bidezko egutegi eta ordutegiak adostea, “lana baldintza egokietan egin ahal izateko”.
11. greba eguna dute gaurkoa Sanmarkoseneko langileek. Orain arteko eguneroko mobilizazioekin jarraituko dutela jakinarazi dute. Hala, astelehen eta asteazkenetan lehen orduko manifestazioak egiten jarraituko dute, eta astearte eta ostegunetan, auto karabanak egiten arratsaldez.
