Bals eta polken erritmoan hasiko du urtea musika bandak
Urte Berriko kontzertua astelehenean izango da, hilaren 6an, 12:30ean Koldo Mitxelena ikastetxearen jolastoki estalian, Alain Aierdi Gurpegik zuzenduta.
EMKE Musika Kultur Elkarteak astelehenean hasiko du denboraldia Urte Berriko kontzertuarekin. Denboraldi berria, “exijentea” eta “proposamen berritzaileekin” datorrela jakinarazi dute, eta hilaren 6koa izango da bide horretan lehen urratsa. Alain Aierdi Gurpegik zuzenduta, Koldo Mitxelena ikastetxearen jolastoki estalian egin du hitzordua Musika Bandak, 12:30ean bals eta polken erritmoan egiteko harrera urte berriari.
Asteleheneko kontzertuaren gaineko berri ematearekin batera, bukatu berri den urtearen balantzea egin du EMKEk, oso positiboa: “Iazkoa oso denboraldi berezia izan da Musika Kultur Elkartearentzat zein Errenteriako Musika Bandarentzat. Goi mailako kontzertu eta jarduerez beteriko denboraldia, hasieran planteatu genituen aurreikuspen guztiak gainditu dituena. Azken urteotako denboraldirik arrakastatsuenetako bat, gure musikari bikainei esker eskaini ahal izan duguna”.
Denboraldi berriaren gainean mintzatu dira arduradunak, eta martxoan haurrei begira Circus musika eta zirku ikuskizun “bikaina” eskainiko dutela aurreratu dute. Denboraldi berrian, euskal konpositoreen lana berreskuratzen jarraituko du EMKEk, bertako musikarien eta horien ekoizpenen sustapenarekin, eta proposamen eszeniko berritzeko prozesuetan sakontzen.
Asteleheneko kontzertuan Aierdik musika bidaian eramango ditu ikus-entzuleak klasiko handien eskutik: Johan Strauss, Aram Khachaturian, Dimitri Shostakovitch, eta Jose Luis Francesena. kontzertu bukaeran”sorpresa” izango dela aurreratu du txikienei begira.
