Lezo-Jaizkibel, guztiz beteta beste behin
Urte berria hastearekin batera salgai jarritako dortsal guztiak agortu egin dira. Hilaren 19an ibilbidea ezagutzeko topaketa egingo dute.
Iazko edizioaren hasierako une bat. Salgai jarri eta gutxira, beste behin, Lezo-Jaizkibel mendiko lasterketaren dortsalak agortu egin dira. Urte berria hastearekin batera zabaldu zuten antolatzaileek izen ematea, eta beti gertatu den bezala, ordu gutxiren buruan parte hartzaileen kupoa zeharo bete egin da. Otsailaren 23an izango da kirol lehiaren hamaikagarren ekitaldia.
Proba prestatzen ari dira, beraz, izena eman duten guztiak. Horretarako, baina, erraztasunak eman nahi dituzte antolakuntzan dabiltzanek: hilaren 19rako (igandea) korrikalarien topaketa antolatu dute, entrenatzeko eta ibilbidea ezagutzeko. 09:30ean egin dute hitzordua Gurutze Santuaren plazan.
Bertara izena eman dutenak, edo besterik gabe kirol goiz goxo bat pasa nahi dutenak joan daitezke. Hala, taldetan egingo dute Lezo-Jaizkibelen ibilbidea bakoitzaren erritmoaren arabera.
