'Txorimaloen ametsak', Landarbasoren proposamen berria
Pieza artistiko hori haurrentzako opera bat da, talde instrumental, koru, dantza, kontalari eta bakarlariei begirakoa. Juan Jose Oconen zuzendaritzapean sortu da ikuskizuna.
Urte berria hastearekin batera, Landarbaso Abesbatzak ikuskizun berri bat aurkeztu du. Emanaldiak Txorimaloen ametsak du izena, eta haurrentzako opera bat da, talde instrumental, koru, dantza, kontalari eta bakarlariei begirakoa. Juan Jose Ocon musikari eta Euskadiko Orkestra Sinfonikoaren zuzendariaren zuzendaritzapean sortu da ikuskizuna.
Txorimaloen ametsak ipuin musikal bat da, non musika instrumentala eta korala bertso kontatu eta kantatuekin elkartzen diren, euskal dantza folklorikoaren zertzeladekin antzeztuta. Emanaldiak txorimalo baten bizipenak islatzen ditu, bere ametsak errealitate bihurtzen diren arte.
Pieza artistiko hori euskara hutsean sortu da, eta 4 eta 11 urte bitarteko haurrentzako “oso egokia” dela adierazi dute sortzaileek. Emanaldiak, gainera, musika, antzezlanak, proiekzio bisualak eta elementu interaktiboak uztartzen ditu, “haurrentzat esperientzia murgiltzaile eta parte hartzailea sortzeko eta haien irudimena eta sormena suspertzeko”. Oconen gidaritzapean, Landarbaso Abesbatza, Villabonako Oinkari Dantza Taldea eta kontalariak aritu dira lanean.
Aurrez aipatu bezala, Txorimaloen ametsak aurkezten duen istorioaren kontaketa euskara hutsean da. Horrez gain, ikuskizunak hainbat balio lantzen ditu, hala nola, genero berdintasuna, enpatia, tolerantzia, errespetua eta elkartasuna.
