Kulturarteko mahaia eratzeko lehen saioa antolatu du udalak
Hilaren 16an izango da lehen saio hori, 18:00etan hasita Joxepa Antoni Aranberri anitzeneko goiko solairuan.
11 kolore jaialdia antolatzen dute besteak beste kulturarteko elkarbizitza sustatzeko. Kulturarteko mahaia sortu nahi du Errenteriako Udalak, eta horri begira lehen saioa antolatu du. Hilaren 16an izango da, 18:000etan Joxepa Antoni Anitzeneko goiko solairuan—Madalen kalea 27—. herrian elkarrekin bizi diren kultura eta komunitate anitzekin osatu nahi du mahai hori, dagoneko elkarlanean ari diren eragile eta pertsonen arteko harremana mantendu eta indartzeko, eta bestetik, lotura berriak sortzeko.
“Sarea zabaltzea da gure nahia udalerrian bizi diren kultur anitzen arteko harremana sendotzeko”, azaldu dute. Azken helburua, kulturarteko herri eredua lortze da, eta horretarako eman beharreko pausuak eta norabideak elkarrekin definitu nahi dituzte, “kulturarteko mahaiak horretarako espazioa izan nahi du”.
Mahai horretako partaide izan nahi duten pertsona eta eragileak gonbidatu ditu udalak horrenbestez, “hala nola euren kultura partekatu eta ezagutarazi nahi duten pertsonak edo gainerakoak ezagutu nahi dituztenak, edota kultura edo hizkuntza aniztasunaren esparruan lan egiten duten profesional zein elkarteak, besteak beste”.
Parte hartu nahi dutenek harremanetan jarri behar dute Kultura Aniztasuna, Giza Eskubideak eta Garapenerako Lankidetza departamentuarekin, 662 94 46 26 whatsAppera mezua bidalita, edota 943 44 95 96 telefono zenbakira deituta.
