Hilaren 16an, Karlos Saldise omentzeko ekitaldia
Hilaren 16an beteko dira 45 urte indar faxista parapolizialek Karlos Saldise Korta hil zutela. Lezoko Sortuk antolatu du herri omenaldia.
Karlos Saldise Korta 1980ko urtarrilaren 16an hil zuten, Lezoko bere etxeko atarian. Batallon Vasco Español eta Grupos Armados Españoles taldeek hartu zuten beren gain hilketa, biak ala biak indar parapolizial faxistak. Urtero moduan, herri omenaldia antolatu du Lezoko Sortuk. Hilaren 16an (osteguna) izango da, hain justu hilketatik 45 urte betetzen diren egunean: Karlos Saldise plazan bertan izango da aitortza ekitaldia, 19:00etan hasita.
1980ko urtarrilaren 16 hartatik hiru hilabetera itxi zuten hilketaren gaineko ikerketa, inolako ondorio edo errudun zantzurik gabe. Iazko urtarrilean, hil eta 44 urte geroago, aitortza jaso zuen Egiari Zor fundazioak egindako lanari esker: Eusko Jaurlaritzaren 2016/12 legeak hala aitortuta, giza eskubideen urraketaren biktima gisa izendatua izan zen. Bere hilketaren arduradun izen-abizendunik ez dago, ordea.
Erabaki horren harira, Mays eta Karmele Saldiseri elkarrizketa egin zien HITZAk iazko urtarrilean, Karlosen bi arrebei alegia. “44 urte luze hauetan ez dugu bakerik izan sekula”, esan zuten.
