Egin daiteke kultur ekitaldiak antolatzeko diru laguntza eskaera
Udalak 500.000 euro bideratuko ditu aurten herritarrekin batera kultur programazioa osatzeko. Hilaren 31 da eskariak egiteko azken eguna.
Oiartzungo kultur eskaintza osatzeko 5000.000 euro pasatxo bideratuko ditu udalak 2025 honetan. Programazio zabala ontzeko asmoz, herriko eragileekin ariko dira elkarlanean. Herri kulturzalea eta sortzailea izatea sustatu nahi du udalak, eta aurreikusitako aurrekontuaren zati handiena, 315.000 euro, herriko elkarte eta norbanakoek antolatutako kultur ekintzak diruz laguntzeko izango da. Beste 185.000 euroak udalak berak antolatuko dituen ekintzetarako izango da.
Aiako Harria Gaztelumendi: “Gure herriko komunitatearen eta ongizatearen oinarria da kultura, eta urtetik urtera handituz doa kultur ekintza eta ekitaldiak antolatzeko grina. Eskaera horiei guztiei bide eman nahi diegu, kultur sarea indartu eta elkarlanean eskaintza aberatsa osatzeko”.
Honezkero badaude herriko urteko agendan zenbait deialdi, ospakizun eta jai zehaztuta, eta horiek antolatzen dituzten eragileentzat 160.000 euro bideratuko dituzte. Horien artean daude, besteak beste, auzoko festak, Hitzen Lihoa, Kantagiltza eta Ihoteak.
Alabaina, diru laguntza horiez gain, udalak beste 155.000 euro gorde ditu jasotzen dituzten proposamenen baitan norgehiagoka bidez banatzeko: 85.000 euro urtean zehar antolatu nahi diren ekitaldietarako, 60.000 euro xanistebanetarako eta beste 10.000 euro kultur sorkuntza sustatzeko.
Hots, Gaztelumendik nabarmendu du urtean zehar kultur ekitaldiak antolatzeko partida indartu egin dutela. “Gero eta eskaera gehiago jasotzen ditugu, eta ahalik eta gehien finantzatzeko, 2025ean ere handitu egin dugu diru laguntza”. 2024an 75.000 euro bideratu zituzten horretara; aurten, 85.000 euro.
Hilaren 31, eskaerak aurkezteko azken eguna
Herritarrek eskaerak aurkezteko epea zabaldu dute honezkero, eta azken eguna hilaren 31 izango da. Laguntzen zenbatekoa eskatzaileek egindako proposamenaren arabera erabakiko dute, eta hainbat irizpide izango dituzte kontuan; hala nola, proposamenaren kalitatea, ikusle edo parte hartzaileen kopurua, emakumeen parte hartzea sustatzeko aurreikusitako ekimenak edota bazterkeria arriskuan dauden kolektiboak erakartzeko egindako ahalegina.
Eskaera horiek udaleko erregistro orokorrean edo egoitza elektronikoan aurkeztu beharko dira. Deialdiaren oinarriak udalaren webgunean daude irakurgai.
