Oiartzungo Feministen Asanblada: "Babestuko gaituen sistema bat behar dugu"
Barakaldoko erailketa matxista salatzeko irten ziren kalera atzo herritarrak, Oiartzungo Feministen Asanbladak deituta.
Barakaldoko hilketa matxista salatzeko elkarretaratzea deitu zuen atzo Oiartzungo Feministen Asanbladak, eta plazan elkartu ziren Emakumeok aske eta bizirik zioen pankartaren atzean. Bazuten, gainera, zer esana asanbladakoek urteko lehen erailketa matxistaren gainean. “Nazkatuta, nekatuta eta haserre hasi dugu urtea! Lehenik eta behin, Oiartzungo Feministon Asanbladatik gure babes ea elkartasun osoa adierazi nahi diegu senide, lagun eta gertukoei. Ez zaudete bakarrik”.
Jendartearen egitura patriarkala agerian uzten duen gertakari bat gehiago dela esanaz jarraitu zuten. “Jakin badakigu erailketa matxistak indarkeria matxistaren eta estruktura heteropatriarkalaren ondorio izugarri eta lazgarrienak direla. Baina, indarkeria matxistak hamaika aurpegi ditu; indarkeria matxista da emakumeon* diru iturriak kontrolatzea, indarkeria matxista da kaletik begiradarekin akosatzea, eraso bat salatzen dugun bakoitzeko gure hitza zalantzan jartzea, indarkeria matxista da gizonen arteko aliantzak eraikitzen eta sostengatzen jarraitzea eta hartu beharreko ardurei entzungo egitea, eta indarkeria matxista dira egunero pairatzen ditugun adibide gehiagoren zerrenda amaigabe bat, zoritxarrez”.
Kasu honetan semeak erail du 84 urteko ama, eta asanbladatik adierazi dutenez, ez da hori izan emakumeekiko izan duen indarkeria bakarrak, “izan ere, gizasemeak aurrekariak zituen bortxa matxistagatik”. Gauzak horrela, lau haizetara zabaldu du taldeak bere eskaria: “Babestuko gaituen sistema bat behar dugu, egungo jarrera konplizeak alboratu eta bizi garen jendarte antolaketa sexistari aurre egiteko benetako neurriak behingoz hartzea exijitzen dugu”.
Emakumeak “soilik emakume izategatik erailtzen gaituzte, eta errealitate gordin horri aurre egiteko” urgentziazko mekanismoak eskatu zituzten “hemen eta orain”. Egungo instituzioen pasibotasun eta jendartearen konplizitatea salatu zuten, eta gehitu, horien ondorioz, urtez urte, emakumeon aurkako erasoek ez dutela etenik. “Indarkeria matxistari aurre egiteko, lehen mailako arazo sozial eta politikotzat hartura izan dadin eskatzen dugu. Gure bizitzak daude jokoan!”.
Eta, amaitzeko, autodefentsa feministarako deia egin zuten. “Bizitzaren aldeko apustu erradikala egiten dugu eta badakigu antolakuntza eta autodefentsa izango direla gure tresna eraginkorrenak. Gu ez gara isilduko, erasorik ez erantzunik gabe! Feministok erantzuteko prest gaude! Lotsa eta beldurra bandoz aldatzen hasi da, eta antolatzen eta saretzen jarraituko dugu, elkarrekin borrokan denak aske izan arte!”.
