Antxo, Euskal Kopako finalerdietara
Zuri-gorriak finalerdietan izango dira Zierbena menperatu ondoren (6-4). Bihar Pasaiako derbia jokatuko dute Donipariren aurka, 18:00etan.
Antxo Areto Futbol Taldea Euskal Kopako finalerdietarako sailkatu da. Antxotarrek asteazkenean jokatu zuten final laurdenetako partida Donibanen, Zierbenaren aurka, eta garaipena etxean gelditu zen (6-4). Pasaitarrek partida “oso zaila” aurreikusten bazuten ere, aurkariak baino intentsitate handiagoarekin kantxaratu ziren, eta hori norgehiagokan islatu zen. Antxotarrek aukera mordoa sortu zituzten lehen zatian, eta aurretik iritsi ziren atsedenaldira (1-0).
Bigarren zatia lehenaren bidetik hasi zen, eta pasaitarrek bigarren gola sartu zuten, markagailuko aldea handituz (2-0). Ondoren, baina, defentsan egindako akats baten ondorioz, Zierbenak 2-1ekoa lortu zuen, eta aldea murriztu zuen markagailuan. Gol horrek ez zituen antxotarrak apaldu, eta hiru gol erreskadan sartu ondoren, markagailuko aldea handitu zuen etxeko taldeak (5-1). Hortik aurrera, bizkaitarrek atezain jokalariarekin jokatu zuten, baina ezin izan zuten garaipena lortu (6-4). Sailkapena etxean gelditu zen, eta finalerdietan izango dira antxotarrak.
Antxoko taldea, gainera, zorioneko dago azken boladan, Euskal Kopako finalerdietarako sailkatzeaz gain, Gipuzkoako Kopa bereganatu baitzuen iragan abenduaren 28an. Zuri-gorriek Oiartzun eta Altza menperatu zituzten Donostiako Josean Gasca kiroldegian jokatutako lauko finalean, eta hirugarrenez ekarri dute Gipuzkoako garaikurra barrutira. Honakoa izan da jarraian lortutako bigarren Gipuzkoako Kopa, iaz ere nagusitu baitziren Oiartzuni eta Ttakuni irabazi ondoren. Lehen garaikurra 2017an lortu zuten.
Kopetako ajeak pasata, antxotarrak bihar itzuliko dira lehiara Donipariren aurkako derbia jokatzeko. Pasaitarren arteko partida Donibanen jokatuko da, 18:00etatik aurrera. 13 jardunaldi jokatuta, Donipari hirugarren postuan da Hirugarren Mailako sailkapenean, 28 punturekin. Antxotarrak, aldiz, zazpigarren dira, 19 punturekin.
