Musika eta arte eszenikoen programazio zabala urteko lehen hiruhilekoan
Kultur agendak estreinaldi batekin zabalduko du sasoi berria: etxeko Dejabu konpainiak Itzulera antzezlan berria estreinatuko du hilaren 18an.
Maite Gartzia Kultura zinegotzia. Argazkia: Herri Bizia Luxuzko kultur eskaintza prestatu du, beste behin ere Errenteriako Udalak. Urteko lehen hilerokorako ondu duen musika eta arte eszenikoen agendaren berri helarazi du gaur prentsa ohar bidez eta jakinarazi, estreinaldi batekin, etxeko talde batenarekin gainera, abiatuko du sasoia programazio horrek hilaren 18an. Errenteria-Oreretako Dejabu konpainiak Itzulera antzezlan berria eskainiko du labetik atera berritan, lehendabizikoz, Lekuona Fabrikan. Umorez, poesiaz eta akzioz betetako lana da errenteriarrena. Iaz Mexikora egindako bidaia kontatzen du Dejabuk, eta nola bertan jazotako ustekabeko gertakari batek euren abenturaren norabidea aldatu zuen. 20:00etan izango da emanaldia.
Antzerkitik musikara jauzi egingo du programazioak hilaren 25ean. Eider abeslari lazkaotarrak kontzertua emango du Lekuona Fabrikan 20:00etan. Feminismotik idatzi ditu Eiderrek bere abestien letrak, eta haren aurretik, Aiert oñatiarra izango da oholtza gainena.
Hilari ginga jartzeko publiko familiarrari begirako Pajaros pintados konpainiaren Olaiaren lorategia antzezlana eskainiko du programazioak hilaren 31n, 18:00etan Niessen Kulturgunean. Otsailaren 7an Go!azen telesailean oinarritutako abestiak eskainiko ditu Basakabik Lekuona Fabrikan, 18:00etan. Musika gehiago; izan ere, Janus Lesterrek Lore disko berria aurkeztuko du otsailaren 15ean Lekuona Fabrikan 20:00etan.
Amets Arzallus eta Ibrahima Balderen Miñan agertokietara eraman duen Artedrama konpainiak ere lekua du programazioan. Otsailaren 16an, 19:00etan, izango da antzezlana Niessen kulturgunean.
Martxoan bi antzezlan eta kontzertu bat izango dira. Lehenengo hitzordua, martxoaren 9an izango da La segunda compañiaren Ondas barbaras antzezlanarekin, 19:00etan. Martxoaren 29an Ttanttaka teatroren Mundua pitzatuta dago baina hantxe gabiltza oinez familiarteko antzezlana eskainiko du. Azken emanaldia, hilaren 29an ere 20:00etan Lekuona Fabrikan. Que lastima bere bigarren diskoa aurkeztuko du Marenek.
Ikuskizunen sarrerak salgai dira jada, online (klik hemen), lekuona Fabrikan, eta Aldakoenean. Kontzertuek 10 euroko prezioa dute, helduentzako ikuskizunek 9 eurokoa, eta familiei zuzendutakoek 3, 5 eurokoa. Kultura txartelaren titularrek %20ko deskontua izango dute.
