Ate irekien jardunaldia egingo du Orereta Ikastolak
Orereta Ikastola ezagutzeko balioko dute saio horiek matrikulazio kanpainaren atarian; hilaren 21ean eta 23an egingo dituzte.
Ate irekien jardunaldia antolatu du Orereta Ikastolak. Orereta Ikastola bertatik bertara ezagutzeko aukera izango dute 2022an edo 2023an jaio diren haurren gurasoek, bereziki. Izan ere, 2025-26 ikasturterako Haur Hezkuntzako matrikulazio kanpaina otsailaren 3tik 14ra izango da indarrean, eta aurretik, ate irekien jardunaldiak egingo dituzte hilaren 21ean eta 23an, euskaraz eta gaztelaniaz hurrenez hurren. Bi saioak Esmalteriako eraikinean izango dira, 17:30ean. Horrez gain, talde txikitako bisitetan parte hartzeko eta bakarkako hitzorduetarako eskaerak egin daitezkeela jakinarazi du, HH, LH eta DBHko familientzako web orriaren bidez (klikatu hemen).
Bertan aurkitu du Orereta Ikastolaren gaineko informazio gehiago ere.
Haur Hezkuntzako zikloa eraberritua
HHko espazioa hezkuntza beharretara egokituta dator aurten, Lino Berriarekin. Hala, Haur Hezkuntzako ziklo gutzia haurren garapen beharretara egokitu du Orereta Iakstolak, “espazioak hezkuntza beharretara egokituak, eta ez hezkuntza beharrak espazioek baldintzatuak”. Haur Hezkuntzako proiektu pedagogikoaren oinarriak ere zehaztu ditu Orereta Ikastolak, “haurren konfiantza eta ongizatea; haien autonomia, berriz, helburua. Ikasleen beharretatik, nahietatik, gustuetatik, jakin minetik abiatuta egiten dugu lan, haurrak erdigunean jarrita”. Haurren sena eta erritmoak ere giltzarri dituztela, haietatik abiatzen direla gaineratu du, “haurra da bere bizitzako protagonista, gu bere bidelagun gara, haurrak gaitasunez betetako pertsonak direla eta ikasteko berezko gaitasuna dutela sinistuta baikaude”.
Profesionalen formazio jarraitua, eta behatzeko zein lan egiteko “modu berritzaileak” aipatu ditu, bestalde: 0-18 urte arteko kalitatezko hezkuntza proiektu propio euskalduna, Euskal Herrikoa, eraldatzailea eta burujabea da Orereta Ikastolarena, Euskal Herrian, euskaran zein euskal kulturan oinarritua eta beste hizkuntza nahiz kulturei irekia. Irabazi asmorik gabeko herri onurako kooperatiba izanik, etengabeko hobekuntzaren eta ikastolako komunitate osoaren elkarlanaren fruitua da: herritik herriarentzat sortua”.
Bukatzeko, eraikin eraberritua, etxeko jatorduak, tutoretza eta orientazio proiektu sendoak, baso eskola propioa eta CAG Curriculum Anitzeko Gelak dituela nabarmen jarri du.
