Inauteriek badituzte gaiak
Antxoko Topaguneak eta Trintxerpeko Korkoiburuek prozesu parte hartzaile bidez hautatu dituzte aurtengo gaiak. Antxon pertsonaia famatuz jantziko dira, eta Trintxerpen, lanbide eta ogibidez.
Martxoaren 1etik aurrera, Pasaiako lau barrutiak inauterien festa giroan murgilduko dira. Hilabete eta erdi geratzen da mozorroen zurrunbiloan murgiltzeko, baina herriko eragileak buru-belarri ari dira jada zita hori prestatzen. Antxon eta Trintxerpen, esaterako, mozorrotzeko gaiak aukeratu dituzte asteburu honetan, eta bi barrutiak jakitun dira zertaz jantziko diren aurten. Herritarrak hasi daitezke mozorroak eta karrozak prestatzen.
Antxoko Topaguneak eta Trintxerpeko Korkoiburuek prozesu parte hartzaile bidez hautatu dituzte aurtengo inauterietako gaiak. Lehenik eta behin, proposamenak bota zituzten herritarrek eragileen sare sozialetan, eta proposamen guztien artean hiru aukeratu zituzten finalerako. Antxoko kasuan pertsonaia famatuena izan da bozkatuena, eta jende ezagun ugari ikusi ahal izango da martxoaren 1etik aurrera barrutian. Trintxerpeko inauteriak, aldiz, martxoaren 7tik 9ra bitartean izango dira, eta trintxerpetarrak lanbidez eta ogibidez jantziko dira, proposamen hori gailendu baita bozken %43,6arekin.
