Nazioarteko Motoziklismo Txapelketari begira jarri da Iñigo Iglesias, ilusioz
Lantalde berriarekin zein motoarekin "zoratzen" dagoela aitortu du Iglesiasek, eta maila igotzea "jauzia" dela aitortuta, erronka eta amets berriak beteko dituen esperantza du errenteriarrak.
Iglesias Triumph taldearekin aurkezpenean. Alemanian da Iñigo Iglesias Bravo pilotu errenteriarra. Bertan, Dortmund hirian zehazki, aurkeztu du asteburuan Triumph taldeak denboraldirako bere proiektua, eta haren parte izango da aurrerantzean Iglesias. Pilotuak ilusioz hartu du IDM Alemaniako Nazioarteko Motoziklismo Txapelketan parte hartzea; 600 zentimetro kubikoetako kategorian ariko da Trimph Germany Supersport Racing taldea eta Alemaniako taldearekin elkarlanean ariko da errenteriarra.
Ilusio handiarekin da pilotua, baita haren ingurukoak ere, “elkarlan berriak epe laburrean emaitzak ematea espero dugu”.
Lantalde berriarekin zein motoarekin “zoratzen” dagoela aitortu du Iglesiasek, “talde berria osatzen duten pertsonetako batzuekin elkarlanean aritu naiz aurretik ere, eta motoak itxura paregabea du, ikusitakoan zirrara sorrarazi dit, eta talde gisa ezarri ditugun markak betetzea espero dut”. Erronka eta amets berriak “lortzea” espero duela ere aitortu du errenteriarrak, “maila igotzea jauzia da jada, eta espero dut 600 zentimetro kubikoetan erronka berriak beteko ditudala”.
Jerezko (Andaluzia, Espainia) zirkuituan orkatila apurtu zuen Iglesiasek Super Sport Munduko Txapelketaren azken proban, frenoetako akats teknikoen ondorioz istripua izanda. Ebakuntza egin behar izan zioten, eta errekuperatzen ari da, baina denbora nahikoa duela pilotuak denboraldia hasten denerako egoki errekuperatzeko azaldu dute.
