Aparkamenduaren egoera "dramatikoa" dela dio PSE-EEk
Aparkamenduaren egoera bizilagunen egunerokoan eragiten ari dela eta "jasangaitza" dela esan dute sozialistek, eta "presazko neurriak" hartzea eskatu.
Barandiaran parkea eraikitzen ari diren orubea. argazkia: PSE-EE Aparkamenduaren egoera “dramatikoa” dela salatu du alderdi sozialistak komunikabideetara helarazitako prentsa ohar bidez. Harago joan, eta “kaotiko” eta “jasangaitza” gisako hitzak erabili ditu, baita bizilagunen egunerokoan “modu larrian” eragiten ari dela gaineratu. Pontikako aparkalekua ezabatzearekin lotu du egoera hori; Barandiaran Parkea izango dena eraikitzeko lanak hasi dituzte eremu horretan. Isaac Palecia sozialisten eledunak esan du “hilabeteak” daramatzala alderdi sozialistak esaten Pontikako aparkalekua ezabatzeak “arazo larriak” eragingo zituela, “baina ez zaigu kasurik egin. Urgentziazkoa da udalak neurriak har ditzan egoera leheneratzeko”.
Aurretik jada “larria” zen egoera, “larriagotu” egin dela erantsi du Palenciak, “batez ere auzoetan”. Aparkatzeko arazori “lehentasunik” eman ez izana egotzi dio EH Bilduri sozialistak, “harago hartutako erabakiekin berez zegoen arazoa okertu baino ez du egin. Adibide gisa, Olibet-Etxeberrietako aparkalekuan 200 plaza eraikitzeko konpromisoa bete ez izana dago. Gainera, arazoa larriagoa den auzoetan: Kaputxinoak, Beraun, Galtzaraborda, Agustinak edo Iztietan okerrera egiten ari den egoera oneratzeko neurririk zehatzik ez dute proposatu”.
Bukatzeko, “urgentziazko neurriak” har ditzan galdegin dio EH Bilduri, “ezinbestekoa da udalak estrategia integrala diseina dezan aparkaleku berriak sortzea eta mugikortasuna hobetzea barnebilduko dituena”.
