Gaur, Karlos Saldise Korta hil zutela 45 urte
Bizi zen etxearen atarian hil zuten. Lore sorta eta dolu-xingola belzdun ikurrina jarri dituzte han. Arratsaldean aitortza ekitaldia izango da.
Gaur, Karlos Saldise Korta Donibanen jaiotako lezoarra hil zutela 45 urte beteko dira. Etxeko atarian tiroz erail zuten Saldise. Gaur, atari horretan bertan, goiz-goizetik, lore sorta eta dolu-xingola belzdun ikurrina jarri dituzte. Arratsaldean, 19:00etan eta Lezoko Sortuk deituta, aitortza ekitaldia egingo diote 1980ko urtarrilaren 16an indar parapolizial faxistek hildakoari, haren izena daraman plazan.
1980ko urtarrilaren 16 hartatik hiru hilabetera itxi zuten hilketaren gaineko ikerketa, inolako ondorio edo errudun zantzurik gabe. Iazko urtarrilean, hil eta 44 urte geroago, aitortza jaso zuen Egiari Zor fundazioak egindako lanari esker: Eusko Jaurlaritzaren 2016/12 legeak hala aitortuta, giza eskubideen urraketaren biktima gisa izendatua izan zen. Bere hilketaren arduradun izen-abizendunik ez dago, ordea, nahiz eta hilketa bi talde parapolizialek hartu zuten bere gain, Batallon Vasco Españolek eta Grupos Armados Españoles GAEk, hain zuzen ere.
Erabaki horren harira, Mays eta Karmele Saldiseri elkarrizketa egin zien HITZAk iazko urtarrilean, Karlosen bi arrebei alegia. “44 urte luze hauetan ez dugu bakerik izan sekula”, esan zuten.
