Paco Rabanneren fundazioak aurrera urratsa egin du
'Desvelando a Rabanne' programa aurkeztu du Francisco Rabaneda Cuervo fundazioak Trintxerpeko alkateordetzan.
Handira aurkeztu dute gaur Francisco Rabaneda Cuervo Fundazioko kidek Desvelando a Rabanne programa. Paco Rabanne Pasaiako Seme Kutunaren ondarea, bizitza eta obra ezagutarazteko misioa izango du eragileak, eta aldi berean, Pasaian goi mailako jostunak utzitako arrastoa balioesteko funtzioa izango du fundazioak. Horrela, munduan ezagun egin zen sortzailearen sorterria modaren mapan jarriko da. Programa bide horretara bideratu dute.
Trintxerpeko alkateordetzan aurkeztu dute egitasmoa. Rabanneren sorterrian. 1934an jaio zen bertan jostuna, eta 2023ko otsailaren 3an hil zen. Teo Alberro alkatea buru, Pasaiako Udalean ordezkaritza politikoa duten alderdi guztietako kideak izan dira, baita Espainiako Gobernuak Gipuzkoan duen ordezkariorde Noemi Lopez, eta Gipuzkoako Foru Aldundiko Kultura diputatu Goizane Alvarez ere. Moda España eragileko presidente Carmen Lopez ere Pasaian izan da. Haiekin guztiekin batera, Pasaiako eragileen ordezkaritzarik ez da falta izan.
Fundazioaren presidente Juanje Neira trintxerpetarra izango da. Ilusioz eta gogoz eman ditu azalpenak “Bide ilusionagarri bat hasi dugu gaur zuekin batera. Pacok esaten zuen eratu behar genuen tresna nagusia bere izena zuen fundazio bat zela. Gure erritmoan sortu genuen. Hura izan zen ohorezko presidente bizirik zenean, eta orain espiritualki ere hala da”. Neirak aipatu du gaurko ekitaldia prestatzeko aurre-lan handia egin dutela, eta eskerrak eman dizkie bertaratutakoei.
Alberro alkatearen arabera, Desvelando a Rabanne programa Pasaiako Seme Kutunaren ondare artistikoa babesteko, zabaltzeko eta balioesteko zereginean baliagarri izango da, “artistaren memoria ohoratzeaz gain, belaunaldi berriek bere ekarpen artistikoa ezagutu ahal izango dute”.
Programa horren barruko lehen zertzeladak eman ditu fundazioaren presidenteak. Azaldu du Rabanneren bizitzari buruzko liburu bat argitaratuko dutela, El cuervo en su jaula izenekoa. Kike Santiagok, Emilio Gilek, Virginia Rodriguezek eta Eva Gongorak osatutako taldearen eskutik ikusiko du argia obrak. Gaurko ekitaldian lehen kapituluaren aurrerapena jasotzen duen koadernotxoa eman diete bertaratuei. Programaren barruan Rabannek egindakoen berri emateko erakusketa, eta Rabanne Gunearen gainean urratsak egitea aurreikusi ditu fundazioak. Gainera, sortzailearen gaineko dokumentala prestatzen ari direla azaldu dute.
Hitzak bakarrik ez. Ekitaldi osoa izan da alkateordetzakoa. Hala, Carlos Sagik eta Iñigo Ibaibarriagak musika doinua jarri diote topaketari, eta Illunbe otxoteak ere kantu bidezko ekarpena egin du. Gainera, opari berezia jaso du fundazioak: Helena Rohner kanariarraren bitxigintzako eskultura pieza, Modesto Lomba Espainiako Moda Sortzaileek Elkartearen presidentearen eskutik.
Ekitaldiaren ondoren badiatik zehar bisita gidatuari ekin diote bertaratuek.
