Berdintasun kontseilua sortzeko bigarren bilera asteazkenean
Kultura aretoan izango da bilera 18:00etan hasita; Berdintasun sailak parekidetasunaren alde lan egin nahi duten norbanako eta eragileei deia egin die bertara daitezen.
Berdintasun Kontseilua errealitatea izan dadin urratsak egiten jarraitzen du Lezoko Udalak, eta zehazki, Berdintasun Sailak. Bide horretan, bigarren bilera deitu du Berdintasun sailak asteazkenerako; Kultur aretoan izango da, 18:00etan hasita. Parekidetasunaren alde lan egin nahi duten norbanako eta eragileei parte hartzeko deia egin die Berdintasun sailak.
Joan den urteko urrian abiatu zuten Berdintasun Kontseilua martxan jartzeko prozesua, orduan egin zuten lehen bilera, eta hamazazpi lagunek egin zuten bat deialdiarekin, Gaxuxa, Lezdi, Etxetxo, Allerru, Piztu Lezo, Ttakun eta Iruntzen elkarte eta taldeetako ordezkariekin batera . Berdintasunaren inguruan gogoeta egin eta elkarlanerako eta adostasunak bilatzeko espazioa izan nahi duela kontseilua zehaztu du Berdintasun sailak, “oro har udal politiketan eta bereziki berdintasun politikan eragiteko”. Ez hori bakarrik, berdintasunaren alde apustu egiten duten pertsonen eta eragile sozialen sarea sortzeaz gain, emakumeen parte hartzea, ahalduntzea, eta protagonismoa sustatu nahi du udalak: “Emakumeen parte hartze sozial eta politikoaren defizitari aurre egitea, euren herritartasun aktiboa indartzea, eta talde feministen eta emakume taldeen lanari aitortza egiteko”.
Hilaren 22ko bileran hainbat gako izango dituzte hizpide biltzen direnek. Hala, sortzeke den organoaren nondik norakoez eztabaidatuko dute: Helburuak, osaera, konpromisoak, sartzeko moduak, lehentasunak, eta prozesuaren diseinua, besteak beste. Oinarrian, duela urte batzuk sortutako dokumentua izango dute, beti ere.
