Ateak parez pare zabalik ditu Lino Berriak
Orereta Ikastolak Agirre Lehendakariaren plazan duen egoitza, ostiralean inauguratuko dute ofizialki hura berritzeko lanak bukatuta. Ikasleak bertan dira hilaren 7az geroztik.
Lino Berriaren liburu txokoa. argazkia: Orereta Ikastola Ostiralean, Hezkuntzaren Nazioarteko Egunaren testuinguruan inauguratuko dute modu ofizialean Lino Berri. Orereta Ikastolak Agirre Lehendakariaren plazan duen eraikina berritu egin dute, eta lanak bukatuta parez pare zabalduko ditu ateak hala nahi duen herritar orok ikusteko aukera izan dezan.
18:00etatik 20:00etara izango da hori, baina aurretik, ekitaldi instituzionala egingo dute. Ekitaldi horretan Orereta Ikastolaren lehendakari Xabier Gorrotxategi Zipitriak, Aizpea Otaegi Mitxelena alkateak eta Nekane Artola Labordeta Ikastolen Elkarteko lehendakariak hartuko dute parte. Santa Klara kaleko eraikina berritzeko lanak iazko ekainean hasi eta abenduan bukatu zituzten Orereta Ikastolak, “2019an Esmalterian hasitako bideari bukaera eman eta Haur Hezkuntzako eraikin eta espazio guztiak hezkuntza-beharretara egokitu eta haien mesedetara jartzeko”.
Ikasleak bertan ari dira hilaren 7az geroztik, baina orain, merezi duen “ongietorria” egin nahi diotela berritutako espazioari zehaztu du Orereta Ikastolak, eta bat egitera deitu herritarrak.
Lino Berria eraikinaren inaugurazioa
- 18:00-20:00: Nor bere kabuz eraikina ikusteko aukera.
- 18:15: Obra gidatu duen arkitektoaren hitzaldia.
- 19:00-19:30: Patata Tropikala konpainiaren Pirata garrapataren abenturak antzezlana.
- 19:30-20:00: Ikastolaren Añabitarteko sukaldean prestatutako mokadua.
