Auzo guztietara iritsi da Wifi4EU sarea
Auzo guztiek dute Errenteriako Udalak bultzatutako wifi sare horren bidez interneterako doakoa sarbidea.
Wifi4EU konektibitate nodo bat. Argazkia: Herri Bizia Errenteriako Udalak bultzatutako Wifi4EU wifi sarea herriko hamabost auzoetara iritsi da,udal geografia osoan zehar banatutako 60 sarbide ireki eta doako baino gehiagorekin. Eraiki diren eraikin publiko guztietan jartzen joan da udala konektibitate eremuak, baita herritarrek beren egunerokoa egiten duten plaza eta eremu askotan ere. Horretarako konektibitate nodoak instalatu dituzte, eta zuntz optikoa helarazi orain arte ez zeuden lekuetara. 30.000 euro baino gehiagoko inbertsioa egin behar izan du udalak horretarako.
Interneterako sarbidea bermatu
Proiektuarekin interneterako sarbidea izateko zailtasun ekonomikoak dituzten pertsonei konektibitatea eman nahi die udalak. Xede hori bera du udaletik zehaztu dutenez, derrigorrezko eskolatze adina duten adingabeak dituzten familientzako gizarte larrialdietarako laguntzen bidez. Laguntza horiek iaz jarri zituen martxan, eta hilean 30 euro bermatzen dituzte interneteko zerbitzuak ordaintzeko, “gaur egun adin txikiko batek nekez euts baitiezaioke eskola erritmoari eskubide hori bermatuta izan gabe”.
Wifi gune ireki eta doakoak auzo guztietara helarazita, 2023-2027 Agintaldi Planeko proiektuetako bat bete duela nabarmendu du udalak.
Sare horretara sarbidea erraza dela azaldu du: “Nahikoa da erabiliko den gailu elektronikoan Wifi4EU izeneko wifi sarea bilatzea—sare hori duten eremuetan—hori hautatzea, eta hurrengo pantailan, Wifira konektatu botoia sakatzea. Behin sarera konektatuta, ohiko moduan nabigatu ahal izango da”. Udal mailan zabaldu den sare hori, Europa osoan zabalduta dagoen sare handi baten parte da.
