Suteak ez dio paperaren ekoizpenari eragin
Papresan sutea izan da gaur goizaldean, enpresak jakinarazi du ez dela kalte pertsonalik izan eta kalte materialek ez dutela paperaren ekoizpenean eraginik izan.
Goizaldean izan da sutea. Argazkia: Papresa. Sutea piztu da gaur goizaldean Papresa lantegian. 00.45ean inguruan izan da gertakaria eta Irun, Zarautz eta Tolosatik bertaratutako suhiltzaileek ia bi ordu behar izan dituzte sua erabat itzaltzeko; suaren fokua 03.30 aldera hartu dutela kontrolpean suhiltzaileek zehaztu du Papresak berak komunikabideetara helarazitako prentsa ohar bidez: “Sua erabat itzali dute lantegiko pertsonalari, suhiltzaileei eta bertaratutako larrialdi zerbitzuei esker”.
Ez du suteak kalte pertsonalik eragin, eta kalte materialak paperaren ekoizpenari eragiten ez dion eremu batean izan dela zehaztu du lantegiak, “goizeko txanda arazorik gabe hasi da lanean”.
Papresak eskerrak eman dizkie suhiltzaileei, larrialdi zerbitzuei, baita hura kontrolatzeko lanean aritu den enpresako pertsonalari ere.
Suak eragindako kalte materialak zenbaterainokoak izan diren esaterik ez dutela oraindik azaldu du Iñigo Uribesalgo Papresako Prebentzio zuzendariak, “egia da, itxita dagoen enpresaren eremu batean izan dela, eta ez diola eragin produkzioari”.
